قرآن مجید میں مختلف رنگوں کےنام کئی معنوں کے اعتبار سے مذکورہے۔ رنگ آفاقی قوت کا ایک مظہر ہے۔ ہمارے اسلاف نے رنگوں کو سمجھنے کے بڑی عرق ریزی سےمطالعہ کیا ہے، ہر رنگ کی اپنی اپنی خصوصیت ہے ،زرد رنگ کو مسرت لانے والے رنگ کے عنوان سےتعبیر کیا گیاہے،سفید رنگ ایک طرف قرآن مجید میں صبح کی سفیدی سے کنایہ ہے تو دوسری طرف شدت سرور اور اندھاہونے کی خبر بھی دیتا ہے۔کالا رنگ رات کی تاریکی اور غم وحزن کا مظہر ہے۔اسی طرح أخضر ،أحمر ،أزرق ،لون الورد اور لون الحوّة ہیں جو قرآن میں مختلف معنوں پر دلالت کرنے کے لیے مستعمل ہیں۔رنگوں میں سب سے زیادہ صفات کاحامل سفید رنگ ہے۔زیر نظر آرٹیکل میں قرآن کریم کے اندر وارد رنگوں کا تذکرہ مختلف ہائے زاویوں سے پیش کرنے کی کوشش کی گئی ہے۔

واضح رہے کہ قرآن مجید میں سب سے پہلےسفیدرنگ کا تذکرہ موجودہے ،لہذا راقم اسی ترتیب کی پاسداری کرتے ہوئے" لون الأبیض" سے آغازکرنے کى جسارت کرتا ہے ۔

• لون الأبیض: Whitish

أبَیَض سفید رنگ کو کہتے ہیں ،اس کی مؤنث بَیضَاء اور جمع بِیض آتی ہے (^[1])۔قرآن میں أبیَضَّ ،تَبیَضُّ(افعلال سے فعل مضارع) ، بَیضَاء ، بَیض اور بِیض ،یہ پانچ قسم کے الفاظ مستعمل ہیں ۔اس لفظ کا تذکرہ قرآن مجيدمیں بارہ آیات میں بارہ مرتبہ مذکور ہےجو مندرجہ ذیل معنوں پر دلالت کرتا ہے :

معنی اول:

اللہ کا فرمان ہے حَتَّى يَتَبَيَّنَ لَكُمُ الْخَيْطُ الْأَبْيَضُ مِنَ الْخَيْطِ الْأَسْوَدِ مِنَ الْفَجْر (^[2])۔

یہاں تک کہ صبح کی سفید دھاری (رات کی) سیاہ دھاری سے الگ نظر آنے لگے۔

اس آیت میں الْأَبْيَضُ ، الْخَيْطُ کی صفت ہے اور الْخَيْطُ عربی میں دھاگے کو کہتے ہیں (^[3])۔الْخَيْطُ الْأَبْيَضُ سے دن اور صبح کی سفیدی مراد ہے۔

سيدناعدی بن حاتم ؓ (^[4])سے مروی ہے کہ اُس آیت کے نازل ہونے کے بعد میں نے دو دھاگے اپنے تکیے کے نیچے رکھے ،اور اس وقت تک کھاتےپیتے جب تک وہ دونوں دھاگے صاف طور پر نظر آجاتے ۔رسول اللہ ﷺ نے ارشاد فرمایا :إن وِسَادَتَکَ لَعَرِیض أن کَانَ الخَیطُ الأبیَض وَ الأسوَد تَحتَ وِسَادَتِکیعنی تمہاراتکیہ تو اتنا بڑا ہے کہ دونوں دھاگے اس میں سما گئے،پھر فرمایا کہ اس سے مراد صبح کی سفیدی ہے(^[5]) ۔

معنی دوم:

اللہ کا فرمان ہے يَوْمَ تَبْيَضُّ وُجُوهٌ وَتَسْوَدُّ وُجُوهٌ فَأَمَّا الَّذِينَ اسْوَدَّتْ وُجُوهُهُمْ أَكَفَرْتُمْ بَعْدَ إِيمَانِكُمْ فَذُوقُوا الْعَذَابَ بِمَا كُنْتُمْ تَكْفُرُونَ(^[6])۔

جس دن بہت سے منہ سفید ہوں گے اور بہت سے منہ سیاہ تو جن لوگوں کے منہ سیاہ ہوں گے (ان سے خدا فرمائے گا) کیا تم ایمان لا کر کافر ہوگئے تھے؟ سو (اب) اس کفر کے بدلے عذاب (کے مزے) چکھو۔

تَبیَضُّ باب افعلال سے مضارع کا صیغہ ہے ابیضاض الوجه کو حقیقی معنی پر بھی محمول کیا جاسکتا ہے کہ قیامت میں ان کے چہرے نعتوں کی وجہ سے سفید اور روشن ہوں گے(^[7])یا یہ انتہائی خوشی سے کنایہ ہے۔علامہ راغب اصفہانیؒ (^[8])فرماتے ہیں:ابْیِضَاضُ الوَجهِ عِبَارَة عَنِ المسَرَّةِ واسوِدَادُهَا عَنِ الغَمِّیعنی ابیضاض الوجهخوشی سے کنایہ ہے اور اسوداد الوجهغم وحزن سے کنایہ ہے(^[9])۔سيدناعبد اللہ بن عباس ؓ(^[10])سے اس آیت کے بارے میں پوچھا گیا، تو فرمایا کہ اس سے مراد اہل السنت والجماعت ہیں (^[11])۔امام شعبی ؒ(^[12]) فرماتے ہیں کہ اس سے مراد اہل قبلہ ہیں(^[13]) ۔

دوسری جگہ اللہ تعالیٰ کا ارشاد ہے:وَأَمَّا الَّذِينَ ابْيَضَّتْ وُجُوهُهُمْ فَفِي رَحْمَةِ اللَّهِ هُمْ فِيهَا خَالِدُون (^[14])۔

اور جن لوگوں کے منہ سفید ہوں گے وہ اللہ کی رحمت (کے باغوں) میں ہوں گے اور ان میں ہمیشہ رہیں گے۔

معنی سوم :

اللہ تعالیٰ کا فرمان ہے: َتَوَلَّى عَنْهُمْ وَقَالَ يَا أَسَفَى عَلَى يُوسُفَ وَابْيَضَّتْ عَيْنَاهُ مِنَ الْحُزْنِ فَهُوَ كَظِيم (^[15])

پھر ان کے پاس سے چلا گیا اور کہنے لگا ہائے افسوس یوسف (ہائے افسوس) اور رنج والم میں (اس قدر روئے کہ) اس کی آنکھیں سفید ہوگئیں اور اس کا دل غم سے بھر رہا تھا۔

ابیِضَاضُ العَینِ اندھا ہونے سے کنایہ ہے،چونکہ آنسو زیادہ بہنے کی وجہ سے آنکھوں کا کالا ڈھیلا ختم ہو کر سفیدی سے تبدیل ہو جاتا ہے، اس کو عربی میں ابیِضَاضُ العَینِ کہا جاتا ہے ۔(^[16])سیدناعبدا للہ بن عباسؓ فرماتے ہیں یہ زیادہ رونے سے کنایہ ہے۔(^[17])علامہ زمخشری ؒ (^[18])فرماتے ہیں جب آنسو آنکھوں سے زیادہ بہہ پڑے تو اس سے آنکھ کاڈھیلا ختم ہو جاتا ہے اور اس میں سفیدی پیدا ہوجاتی ہے ۔(^[19])

معنی چہارم:

سیدنا موسٰی علیہ السلام نے ہاتھ گریبان میں ڈال کر اور بغل میں دبا کر نکالا تو وہ غیر معمولی طور پر سفید اور چمک دار تھا ،سیدنا عبداللہ بن عباس ؓ فرماتے ہیں ،اس میں ایسی غیر معمولی چمک ہوتی جو زمین وآسمان کے درمیان خلا کو روشن کر دیتا۔(^[20])

ید بیضا کا معجزہ قرآن میں پانچ آیات میں صراحۃ مذکور ہے :

۱۔ وَنَزَعَ يَدَهُ فَإِذَا هِيَ بَيْضَاءُ لِلنَّاظِرِينَ (^[21])

اور اپنا ہاتھ باہر نکالا تو اسی دم دیکھنے والوں کی نگاہوں میں سفید براق (تھا)۔

۲۔ وَاضْمُمْ يَدَكَ إِلَى جَنَاحِكَ تَخْرُجْ بَيْضَاءَ مِنْ غَيْرِ سُوءٍ آيَةً أُخْرَى(^[22])

اور اپنا ہاتھ اپنی بغل سے لگالو وہ کسی عیب (وبیماری)کے بغیر سفید (چمکتا دمکتا) نکلے گا۔ (یہ) دوسری نشانی (ہے)۔

۳۔ وَنَزَعَ يَدَهُ فَإِذَا هِيَ بَيْضَاءُ لِلنَّاظِرِين (^[23])

اور اپنا ہاتھ نکالا تو اسی دم دیکھنے والوں کے لیے سفید (براق نظر آنے لگا)۔

۴۔ وَأَدْخِلْ يَدَكَ فِي جَيْبِكَ تَخْرُجْ بَيْضَاءَ مِنْ غَيْرِ سُوءٍ فِي تِسْعِ آيَاتٍ إِلَى فِرْعَوْنَ وَقَوْمِهِ إِنَّهُمْ كَانُوا قَوْمًا فَاسِقِينَ (^[24])

اور اپنا ہاتھ اپنے گریبان میں ڈالو سفید نکلے گا۔ (ان دو معجزوں کے ساتھ جو) نو معجزوں میں (داخل ہیں) فرعون اور اس کی قوم کے پاس جاؤ کہ وہ بےحکم لوگ ہیں۔

۵۔ اسْلُكْ يَدَكَ فِي جَيْبِكَ تَخْرُجْ بَيْضَاءَ مِنْ غَيْرِ سُوء(^[25])۔

اپنا ہاتھ گریبان میں ڈالو تو بغیر کسی عیب کے سفید نکل آئے گا۔

بعض ملحدین سیدناموسیٰؑ کے دونوں معجزوں(ید بیضاء اور عصا)سے انکار کرتے ہیں کہ ثعبان اور ید بیضاء سے مراد یہ ہے کہ اللہ نے سیدناموسیؑ کو ایسے دلائل عطا کئے تھے ،جو ثعبان کی طرح مخالفین کے دلائل اور اقوال کو ختم کر دیتے،اور ایسے ظاہر تھے کہ اس کو ید بیضاء سے تعبیر کیا،ید بیضا عرب کے ہاں ضرب المثل ہے اور وہ ہر بے ضرر وبے خطر نعمت کے لیے استعمال کرتے ہیں(^[26])،مگر ان معجزات کو اس تأویل پر محمول کرنا اللہ تعالیٰ اور اس کے رسول ﷺ کو جھٹلانے کے مترادف ہے ۔(^[27])

معنی پنجم:

اللہ تعالیٰ فرماتے ہیں وَمِنَ الْجِبَالِ جُدَدٌ بِيضٌ وَحُمْرٌ مُخْتَلِفٌ أَلْوَانُهَا وَغَرَابِيبُ سُودٌ (^[28]) ۔

اور پہاڑوں میں سفید اور سرخ رنگوں کے قطعات ہیں اور (بعض) کالے سیاہ ہیں۔

بِیض،أبیَض کی جمع اور جُدَد،جُدَّة کی جمع ہے ،پہاڑوں میں جو گھاٹیاں ہوتی ہیں ان کو عربی میں جُدَّةکہتے ہیں (^[29])۔اس آیت میں ﮰ ﮱکی ضمیر یاتو بِیض اور حُمر کی طرف راجع ہے ۔مطلب یہ ہے سفید اور سرخ رنگ کئی قسم پر ہے ،اس وجہ سے اللہ نےسود کو غربیب کے ساتھ مؤکد کرکے مؤخر ذکر فرمایا (^[30])یا یہ ضمیر جدد کی طرف راجع ہے کہ پہاڑ کی گھاٹیوں میں بعض سفید،بعض سرخ اور بعض انتہائی کالے ہیں (^[31])۔

معنی ششم:

جنتیوں کے شراب کے بارے میں اللہ کا ارشاد ہے ﭽ بَيْضَاءَ لَذَّةٍ لِلشَّارِبِينَ ﭼ (^[32])۔

جو رنگ کی سفید اور پینے والوں کے لیے (سراسر) لذت ہوگی۔

بَیضَاء،أبیَض کی مؤنث اورکَأس کی صفت ہے ،کَأس ہر اس گلاس یا برتن کو کہتے ہیں جس میں شراب ہو (^[33])۔سیدناعبد اللہ بن مسعود ؓ (^[34])کی قراءت میں بَیضَاء کی بجائے صَفرَاء ہے (^[35])،بَیضَاء والی قراءت میں وہ کأس کی بھی صفت بن سکتی ہے اور خمر کی بھی ، صفراء والی قرأت میں صرف خمر کی صفت بنے گی(^[36]) ۔

معنی ہفتم:

اللہ تعالیٰ کا فرمان ہے كَأَنَّهُنَّ بَيْضٌ مَكْنُونٌ(^[37])۔

گویا وہ محفوظ انڈے ہیں۔

بیض انڈے کو کہتے ہیں ،زجاج ؒ (^[38])فرماتے ہیں کہ اس آیت میں جنت کے حوروں کے رنگوں کو شترمرغ کے انڈوں کےرنگ کے ساتھ تشبیہ دی ہے (^[39])۔سعید بن جبیرؒ کے نزدیک بیض سے مراد انڈے کی زردی ہے(^[40])اور عبد اللہ بن عباسؓ فرماتے ہیں کہ اس سے مرادلؤلؤ(موتی) ہیں(^[41])۔

*لون الأسود: Blackish

أسود،کالے رنگ کو کہتے ہیں ،اس کی مؤنث سَودَاء اور جمع سُود آتی ہے ۔قرآن میں أسوَد،اسوَدّت،مُسوَدّ،سُود،تَسوَدُّاورمُسوَدَّةیہ چھ قسم کے الفاظ مستعمل ہیں اس رنگ کا تذکرہ قرآن میں چھ آیات میں سات مرتبہ آیاہے ،یہ تین معنوں پر دلالت کرتا ہے:

معنی اول:

اللہ تعالیٰ کا ارشاد ہے حَتَّى يَتَبَيَّنَ لَكُمُ الْخَيْطُ الْأَبْيَضُ مِنَ الْخَيْطِ الْأَسْوَدِ مِنَ الْفَجْر(^[42])

یہاں تک کہ صبح کی سفید دھاری (رات کی) سیاہ دھاری سے الگ نظر آنے لگےاس آیت میں الخیط الأسود سے رات کی تاریکی مراد ہے (^[43]) ۔

معنی دوم:

اللہ تعالیٰ کا فرمان ہے يَوْمَ تَبْيَضُّ وُجُوهٌ وَتَسْوَدُّ وُجُوهٌ فَأَمَّا الَّذِينَ اسْوَدَّتْ وُجُوهُهُمْ أَكَفَرْتُمْ بَعْدَ إِيمَانِكُمْ فَذُوقُوا الْعَذَابَ بِمَا كُنْتُمْ تَكْفُرُون (^[44])

جس دن بہت سے منہ سفید ہوں گے اور بہت سے منہ سیاہ تو جن لوگوں کے منہ سیاہ ہوں گے (ان سے اللہ فرمائے گا) کیا تم ایمان لا کر کافر ہوگئے تھے؟ سو (اب) اس کفر کے بدلے عذاب (کے مزے) چکھو۔

اسی طرح وَإِذَا بُشِّرَ أَحَدُهُمْ بِالْأُنْثَى ظَلَّ وَجْهُهُ مُسْوَدًّا وَهُوَ كَظِيم (^[45])

حالانکہ جب ان میں سے کسی کو بیٹی (کے پیدا ہونے) کی خبر ملتی ہے تو اس کا منہ (غم کے سبب) کالا پڑ جاتا ہے اور (اس کے دل کو دیکھو تو) وہ اندوہناک ہوجاتا ہے۔

وَيَوْمَ الْقِيَامَةِ تَرَى الَّذِينَ كَذَبُوا عَلَى اللَّهِ وُجُوهُهُمْ مُسْوَدَّةٌ أَلَيْسَ فِي جَهَنَّمَ مَثْوًى لِلْمُتَكَبِّرِينَ (^[46])

اور جن لوگوں نے اللہ پر جھوٹ بولا تم قیامت کے دن دیکھو گے کہ ان کے منہ کالے ہو رہے ہوں گے۔ کیا غرور کرنے والوں کو ٹھکانا دوزخ میں نہیں ہے۔اور ﭽ وَإِذَا بُشِّرَ أَحَدُهُمْ بِمَا ضَرَبَ لِلرَّحْمَنِ مَثَلًا ظَلَّ وَجْهُهُ مُسْوَدًّا وَهُوَ كَظِيمٌ (^[47])

حالانکہ جب ان میں سے کسی کو اس چیز کی خوشخبری دی جاتی ہے جو انہوں نے رحمن کے لیے بیان کی ہے تو اس کا منہ سیاہ ہوجاتا اور وہ غم سے بھر جاتا ہے

اسوِدَادُ الوَجهغم سے کنایہ ہے،کیونکہ جب انسان کا غم حد سے بڑھ جاتا ہے،تو روح دل کے اندر منجمد جاتا ہےاور چہرے کے ظاہر پر کوئی اثر باقی نہیں رہتا،جس کی وجہ سے چہراکبھی کالا ،کبھی سرخ اور کبھی مٹیالے رنگ کا ہوجاتا ہے(^[48])۔ابیضاض الوجه،خوشی سے کنایہ ہے اور اسوداد الوجهغم وحزن سے کنایہ ہے(^[49])۔

معنی سوم:

اللہ تعالی کا ارشاد ہے وَمِنَ الْجِبَالِ جُدَدٌ بِيضٌ وَحُمْرٌ مُخْتَلِفٌ أَلْوَانُهَا وَغَرَابِيبُ سُودٌ (^[50])۔

اور پہاڑوں میں سفید اور سرخ رنگوں کے قطعات ہیں اور (بعض) کالے سیاہ ہیںاس آیت میں گھاٹیوں کےرنگ بیان کئے گئے ہیں ،غَرَابِیب،غِربِیب کی جمع ہے ،جس طرح أصفَر فَاقِع شدت زردی کے لیے آتا ہے ، اسی طرح شدت سَوَاد کے لیے أسوَد غِربِیب مستعمل ہے(^[51]) ۔یعنی گھاٹیوں میں بعض انتہائی کالے ہیں ۔

• لون الأخضر: Greenish

أخضَرعربی میں سبزرنگ کوکہتےہیں،مؤنثخَضرَاءاورجمعخُضرآتی ہے(^[52])قرآن میں اس رنگ کےلیےأخضَر،خَضرَاء،خُضر، مُخضَرَّةاور خَضِرمستعمل ہیں ،قرآن میں ساتھ سورتوں میں آٹھ مقامات پر مذکور ہے ،جو قرآن میں چار معنوں پر دلالت کرتا ہے :

معنی اول:

بارش کے بعد کھیتیوں کے رنگ سرسبر و شاداب ہو جاتے ہیں ،اس کے بارے میں اللہ کا فرمان ہے وَهُوَ الَّذِي أَنْزَلَ مِنَ السَّمَاءِ مَاءً فَأَخْرَجْنَا بِهِ نَبَاتَ كُلِّ شَيْءٍ فَأَخْرَجْنَا مِنْهُ خَضِرًا نُخْرِجُ مِنْهُ حَبًّا مُتَرَاكِبًا (^[53])

اور وہی تو ہے جو آسمان سے مینہ برساتا ہے، پھر ہم ہی (جو مینہ برساتے ہیں) اس سے ہر طرح کی روئیدگی اگاتے ہیں۔ پھر اس میں سے سبز کونپلیں نکالتے ہیں۔

خَضِر اور أخضَر ایک ہی معنی میں ہیں ،الخَضِرُ فِی کِتَابِ الله هوَ الزَّرعُ،یعنی قرآن مجید میں خضر سے مرد تر کھیتی ہے (^[54])۔

معنی دوم:

(وَقَالَ الْمَلِكُ إِنِّي أَرَى سَبْعَ بَقَرَاتٍ سِمَانٍ يَأْكُلُهُنَّ سَبْعٌ عِجَافٌ وَسَبْعَ سُنْبُلَاتٍ خُضْرٍ وَأُخَرَ يَابِسَاتٍ)(^[55])

اور بادشاہ نے کہا کہ میں (نے خواب دیکھا ہے) دیکھتا (کیا) ہوں کہ سات موٹی گائیں ہیں جن کو سات دبلی گائیں کھا رہی ہیں اور سات خوشے سبز ہیں اور (سات) خشک۔

خُضر،خَضرَاء کی جمع ہے اور خَضرَاء أخضَر کی مؤنث ہے اور آیات کریمہ میں سبز خوشوں سے سات زرخیز سال مراد ہیں (^[56])۔

أَلَمْ تَرَ أَنَّ اللَّهَ أَنْزَلَ مِنَ السَّمَاءِ مَاءً فَتُصْبِحُ الْأَرْضُ مُخْضَرَّةً إِنَّ اللَّهَ لَطِيفٌ خَبِير (^[57])

کیا تم نہیں دیکھتے کہ خدا آسمان سے مینہ برساتا ہے تو زمین سرسبز ہوجاتی ہے۔ بےشک خدا باریک بین اور خبردار ہے۔

مُخضَرَّة باب افعلال سے اسم فاعل ہے ،یعنی سرسبز وشاداب ہونا (^[58])۔

معنی سوم:

جنتیوں کا لباس بھی سبز رنگ کا ہوگا ،اللہ فرماتے ہیں ﭽ يُحَلَّوْنَ فِيهَا مِنْ أَسَاوِرَ مِنْ ذَهَبٍ وَيَلْبَسُونَ ثِيَابًا خُضْرًا مِنْ سُنْدُسٍ وَإِسْتَبْرَقٍ ﭼ(^[59])ان کو وہاں سونے کے کنگن پہنائے جائیں گے اور وہ باریک دیبا اور اطلس کے سبز کپڑے پہنا کریں گے۔

اور ﭽ عَالِيَهُمْ ثِيَابُ سُنْدُسٍ خُضْرٌ وَإِسْتَبْرَق ﭼ (^[60])۔

ان (کے بدنوں) پر دیبا سبز اور اطلس کے کپڑے ہوں گے۔

وَخُصَّ الأَخضَرُ بِالذِّکرِ لِأَنَّه المُوَافِقُ لِلبَصَرِ(^[61])،یعنی اللہ نے سبز رنگ کو خاص اس وجہ سے کیا کہ یہ رنگ نظروں کو اچھا لگتا ہے ۔

سُندُس سے مراد باریک ریشم اور استَبرَق سے مراد موٹا ریشم ہے (^[62])۔

معنی چہارم:

جنتیوں کے تکیوں کا رنگ بھی سبز ہوگا ،اللہ کا ارشاد ہے مُتَّكِئِينَ عَلَى رَفْرَفٍ خُضْرٍ وَعَبْقَرِيٍّ حِسَان (^[63])سبز قالینوں اور نفیس مسندوں پر تکیہ لگائے بیٹھے ہوں گے۔

رفرف کی تفسیر میں مندرجہ ذیل اختلاف ہے :

عبد اللہ بن عباس ؓ کے ہاں اس کا معنی بُسُط ہے ،یہ جمع ہے بساط کی ،جس کا معنی ہے بچھونا (^[64])۔

سعید بن جبیر(^[65]) ؓ فرماتے ہیں کہ اس سے مراد ریاض الجنۃ ہے(^[66]) ۔

قتادہ ؓ (^[67])کے نزدیک اس سے مراد وسائد اور مرافق ہیں ،جو تکیوں کو کہتے ہیں (^[68])۔

جو معنی بھی لیا جائے اور جنتی جس چیز پر بھی تکیہ لگائیں گے وہ سبز ہوں گے ۔

• لون الأزرق: :Bluish

أزرقنیلے رنگ کو کہتے ہیں ،مؤنث زرقاء او ر جمع زُرق آتی ہے(^[69]) ،قرآن میں ایک ہی مرتبہ مذکور ہے ۔اللہ کا ارشاد ہے يَوْمَ يُنْفَخُ فِي الصُّورِ وَنَحْشُرُ الْمُجْرِمِينَ يَوْمَئِذٍ زُرْقًا (^[70])

جس روز صور پھونکا جائے گا اور ہم گنہگاروں کو اکھٹا کریں گے اور ان کی آنکھیں نیلی نیلی ہوں گی۔

علامہ راغب فرماتے ہیں زرقةسفیداور کالے رنگ کے درمیان ایک رنگ کانام ہے(^[71])۔امام فراءؒ (^[72])کے نزدیک زرقاکنایہ ہےاندھے ہونے سے (^[73])۔علامہ زجاجؒ کے نزدیک شدت پیاس سے کنایہ ہے(^[74])اور یا یہ انتہائی خوف کی وجہ سے آنکھوں کا ہکا بکا رہ جانے سےکنایہ ہے(^[75])۔عبداللہ بن عباس ؓ کے پاس ایک شخص آیا اور عرض کیا کہ ایک جگہ اللہ تعالیٰ کا ارشاد ہے وَنَحْشُرُهُ يَوْمَ الْقِيَامَةِ أَعْمَى (^[76])اور دوسری جگہ اللہ تعالیٰ فرماتے ہیں ﭽ يَوْمَ يُنْفَخُ فِي الصُّورِ وَنَحْشُرُ الْمُجْرِمِينَ يَوْمَئِذٍ زُرْقًا ﭼ(^[77])۔آپ نے ارشاد فرمایا کہ قیامت میں مختلف حالات ہوں گے کبھی اندھے ہوں گے اور کبھی شدت پیاس کی وجہ سے آنکھیں نیلی ہوں گی (^[78]) ۔

• لون الأحمر: :Redish

أحمر سرخ رنگ کو کہتے ہیں ،مؤنث حمراء اور جمع حمرآتی ہے ،گہرے کالے رنگ کے لیے أحمَر قَانٍ استعمال ہوتا ہے (^[79]) ۔یہ لفظ قرآن میں ایک مرتبہ مذکور ہے، پہاڑ کی گھاٹیوں کے رنگوں میں ایک رنگ أحمر بھی ہے ،اللہ کا ارشاد ہے وَمِنَ الْجِبَالِ جُدَدٌ بِيضٌ وَحُمْرٌ مُخْتَلِفٌ أَلْوَانُهَا وَغَرَابِيبُ سُودٌ (^[80])

اور پہاڑوں میں سفید اور سرخ رنگوں کے قطعات ہیں اور (بعض) کالے سیاہ ہیں۔

* لون الورد: :Pinkish

وردگلابی رنگ کو کہتے ہیں ،یہ رنگ قرآن میں ایک مرتبہ مذکور ہے ، آسمان پٹنے کے بعد اس کا رنگ کس طرح ہوگا،قرآن میں اللہ فرماتے ہیں فَإِذَا انْشَقَّتِ السَّمَاءُ فَكَانَتْ وَرْدَةً كَالدِّهَان (^[81])

پھر جب آسمان پھٹ کر تیل کی تلچھٹ کی طرح گلابی ہوجائے گا (تو) وہ کیسا ہولناک دن ہوگا۔

فراء رحمہ اللہ سے منقول ہے کہ وردة یہاں حمراءکے معنی میں ہے ،چونکہ گھوڑوں میں بعض گھوڑے الفرس الورد کے نام سے مشہور ہے،یہ گھوڑا فصل ربیع میں زرد اور سردیوں میں خاکستری رنگ کا ہوتا ہے ۔رنگوں کے مختلف ہونے کی وجہ سے آسمان کو اس سے تشبیہ دی گئی (^[82])۔علامہ رازیؒ(^[83])فرماتے ہیں کہ وَردَۃ لِلمَرَّة مِنَ الوُرُودِ أی الحَرَکَة اللَّتِی بِها الاِنشِقَاقُ کَانَت وَردَة وَاحِدَة(^[84]) یعنی وہ حرکت جس کی وجہ سے آسمان میں پھٹن پیدا ہوگا وہ ایک ہی حرکت ہوگی۔

* لون الأدهم:Greenish:

رات کی تاریکی کو دُهمَة کہا جاتا ہے،انتہائی گہرےسبز رنگ کو بھی دُهمَةسے تعبیر کیا جاتا ہےکیوں کہ یہ دونوں رنگ دیکھنے میں ایک جیسے معلوم ہوتے ہیں(^[85])۔یہ بھی قرآن میں ایک ہی مرتبہ مذکور ہے،جنت کی صفت بیان کرتے ہوئے اللہ کا ارشاد ہے مُدْهَا مَتَانْ(^[86])۔

دونوں خوب گہرے سبز۔

فراء ؒفرماتےہیں وہ دونوں جنت خوش منظر ہونے کی وجہ سے انتہائی گہرے سبز ہوں گے(^[87])۔سعید بن جبیرؒ فرماتےہیں کہ اس سےمراد سبز رنگ ہےاورمجاہدؒ فرماتےہیں کہ وہ دونوں سیاہ رنگ کےہوں گے(^[88])۔

• لون الحوة :Blackish:

حوة انتہائی کالے رنگ کو بھی کہتے ہیں اور انتہائی سبز رنگ کو بھی کہا جاتا ہے(^[89])۔اللہ کا ارشاد ہے فَجَعَلَهُ غُثَاءً أَحْوَى(^[90]) پھر اس کو سیاہ رنگ کا کوڑا کر دیا۔

اگرپہلا معنی مراد لیا جائے تو یہ خشک ہونے سے کنایہ ہے ،اس صورت میں احوی ،غثاء کی صفت ہوگی اور اگر دوسر ا معنی مراد لیا جائے تو احوی ،المرعی سے حال ہوگا(^[91])۔علامہ امین احسن اصلاحیؒ (^[92])اپنی تفسیر تدبر قرآن میں رقم طراز ہیں:

أحوٰی ہرگز اس سیاہی کے لیے نہیں آتا جو کسی شئی میں اس کی کہنگی ،بوسیدگی،اور پامالی کے سبب سے پیدا ہوتی ہو بلکہ یہ اس سیاہی مائل یا سبزی کے لیے آتا ہے جو کسی شئی پر اس کی تازگی ،شادابی ،زرخیزی اور جوش نمو کے سبب سے بنایاں ہوتی ہو(^[93])۔

* نتائج بحث:* اللہ تعالٰی کی بنائی ہوئی کائنات اور اس میں مختلف رنگوں کی موجودگی اللہ کے وجود کی گواہی دیتی ہے ۔

• قرآن مجید ایک معجز کتاب ہے جس میں ایک ہی لفظ مختلف معانی پر دلالت کرتا ہے۔

• سیدنا عدی بن حاتم ؓ کی حدیث سے یہ معلوم ہوتا ہے کہ نفس عربی قرآن فہمی کے لیے کافی نہیں بلکہ رسول اللہ ﷺ کی احادیث مبارکہ کا علم ہونابھی ضروری ہے۔

حوالہ جات