تمہید

روحانیت کے درجات ومراتب میں سب سے افضل ترین مقام و مرتبہ نبوت و رسالت کا ہے جس میں انسان خالق کائنات سے براہ ِراست فیض اورعلم حاصل کرتا ہےاور پھر اس نور اور روشنی سے دیگر انسانوں کے قلوب کو منور کرتا ہے۔ یقینا یہ ایک غیر معمولی دعویٰ ہے جو نبی اور رسول کرتا ہےاور بدیہی طور پر اس کا متقاضی ہے کہ اس کے لئے مضبوط دلائل پیش کئے جائیں؛ اسی لئے اللہ تبارک وتعالیٰ کی طرف سے تمام انبیاء علیھم السلام کو ایسی خصوصی صفات و امتیازات، نشانیوں اور دلیلوں سے نواز ا جاتا ہے جن سے واضح طور پرعقل سلیم رکھنے والے ان کی نبوت کی معرفت حاصل کرلیتے ہیں یہی"دلائل و اعلام نبوت" ہیں جن میں سے اعلیٰ ترین نشانی کا نام" معجزہ" ہے جو اللہ تبارک و تعالیٰ تمام انبیاء علیھم السلام کو ضرور عطا فرماتے ہیں۔

 

سیرت طیبہ کےمصادر کی ایک قسم " کتب دلائل اور اعلام نبوت" کہلاتی ہے جن میں محمدﷺکی نبوت کی نشانیا ں تحریر کی جاتی ہیں اورمختلف دلیلوں سےنبوت ورسالت کو ثابت کیاجاتا ہے ۔ امام ابو سعد الخرکوشیؒ ^[1]اورقاضی عیاض ^[2] کی کتابیں رسول اللہ ﷺکے شرف، عظمت اور حقوق کے حوالے سےتو مشہور ہیں لیکن ان میں حضور صلی اللہ علیہ وسلم کی نبوت کے اعلام اور دلائل کابھی کافی مواد موجود ہے، یہی اس مقالے کا موضوع ہے۔

 

مقالہ کا بنیادی سوال

شرف المصطفی اور الشفا میں اللہ کے رسول محمدﷺ کی نبوت و رسالت کی کیا کیا نشانیاں اور دلائل مذکور ہیں ؟ اور عصر حاضر میں ان کی اہمیت وافادیت کیا ہے؟

 

سابقہ کام کا جائزہ

ان دونوں کتابوں کے منہج اور مؤلفین پر سیرت نگاروں کی حیثیت سے کام ہوا ہے لیکن خاص اس موضوع اور بطور کتب دلائل و اعلام ان پر سابقہ کوئی کام نہیں ہے۔

 

مقالہ کا اسلوب

مقالہ میں بیانیہ اسلوب اختیار کیا گیا ہے اور ضرورت کے مطابق تحقیق، تخریج اور تجزیہ شامل ہے۔ آخر میں نتائج اور سفارشات ذکر کی گئی ہیں۔

 

اعلام كا مفہوم

ابن منظور تحریر کرتے ہیں:

 

"والعَلَمُ: شَيْءٌ يُنْصَب فِي الفَلَوات تَهْتَدِي بِهِ الضالَّةُ. . . . والعَلَمُ: العَلامةُ. وَالْجَمْعُ أَعْلامٌ وعِلامٌ. "^[3]

 

"العَلَمُ: وہ چیز جو صحراؤں میں گاڑھی جاتی ہے جس سے راستہ بھٹکنےوالے راہنمائی حاصل کرتے ہیں۔ نشانی۔ اس کی جمع "اَعْلامٌ اور عِلامٌ. "ہے۔"

 

دلائل کا مفہوم

محمد بن ابی بکر الرازیؒتحریر کرتے ہیں:

 

"و (الدَّلِيلُ) : مَا يُسْتَدَلُّ بِهِ. وَقَدْ (دَلَّهُ) عَلَى الطَّرِيقِ يَدُلُّهُ بِالضَّمِّ (دَلَالَةً) بِفَتْحِ الدَّالِ وَكَسْرِهَا وَ (دُلُولَةً) بِالضَّمِّ، وَالْفَتْحُ أَعْلَى. "^[4]

 

"دَلِيل: ہر وہ چیز جس سے استدلال کیا جائے اور اسے دلیل بنایا جائے۔ (دَلَّ، يَدُلُّ) باب نصر سے اس کامعنی ہے: راستہ بتانا اور راہنمائی کرنا۔ اس کا مصدر (دَلَالَةً) فتحہ وکسرہ دونوں کے ساتھ منقول ہے لیکن فتحہ اولی ہے اور ضمہ کے ساتھ (دُلُولَةً) بھی مستعمل ہے۔"

 

لسان العرب اورمعجم المعانی الجامع میں تحریرہے:

 

"والدَّلِيل: اسم وَالْجَمْعُ أدِلَّة وأدِلَّاء ودلائلُ. وَالمرشد. والجمع: أدِلَّة، وأدِلاَّء، برهانٌ، بيِّنة، حجّة، شاهد، علامة. "^[5]

 

"دَلِيل اسم ہے اور اس کی جمع "أدِلَّة، ادِلَّاء اور دلائل" آتی ہے۔ مرشد اور رہبرکے لئے بھی استعمال ہوتا ہے۔ جمع"ادِلَّة و ادِلاَّء" ہے۔حجت،   گواہ اور نشانی کو بھی دلیل کہا جاتا ہے۔ "

 

علامہ جرجاني ؒ اصطلاحی تعریف کرتے ہوئے فرماتے ہیں:

 

"الدَّلِيلُ هو الذي يلزم من العلم به العلم بشيء آخر"^[6]

 

"جس کےجاننے سے دوسری چیز کا جاننا لازم آتا ہو"

 

المعجم الوسيط میں ہے:

 

" (الدَّلالة) الإرشاد وما يقتضيه اللفظ عند إطلاقه، [ ج ] دَلائل ودلالات"^[7]

 

"دَلَالَة: راہنمائی کرنا، عند الاطلاق لفظ کی مراد، اس کی جمع "دلائل اور دلالات" ہے۔"

 

جبکہ علامہ جرجاني تحریر کرتے ہیں:

 

"الدلالة: هي كون الشيء بحالة يلزم. . . والشيء الأول هو الدال، والثاني هو المدلول. "^[8]

 

"دلالت کہتے ہیں کسی چیز کاایسے طریقے پر ہونا کہ اس کے جاننے سے دوسری چیز کاعلم حاصل ہوجائے۔ پہلی چیز کو "الدال" اور دوسری کو "المدلول" کہتے ہیں۔"

 

دلائل النبوۃ کا مفہوم

شيخ الاسلام ابن تيمیہؒ "آيات الانبياء" (دلائل النبوة) کی وضاحت کرتے ہوئے تحریر فرماتے ہیں:

 

"وهي الأدلة والعلامات المستلزمة لصدقهم، والدليل لا يكون إلاَّ مستلزما للمدلول عليه مختصاً به، لا يكون مشتركاً بينه وبين غيره؛ فإنّه يلزم من تحقّقه تحقّق المدلول وإذا انتفى المدلول انتفى هو. . . . فما وُجد مع النبوّة تارةً، ومع عدم النبوّة تارةً، لم يكن دليلاً على النبوّة، . . . "^[9]

 

"اس سےمراد وہ نشانیاں اور دلیلیں ہیں جن سےانبیاء کرام علیہم السلام کا سچا ہونا لازم آتا ہےاور یہ اسی وقت ہوگا جب دلیل اپنے مدلول علیہ کے ساتھ مختص ہو کسی دوسرے کے ساتھ مشترک نہ ہوکہ جب بھی دلیل پائی جائے تومدلول بھی پایا جائےاور مدلول نہ ہو تو دلیل بھی باقی نہ رہے۔پس جو مدلول کی غیر موجودگی میں بھی پائی جائے وہ دلیل نہ ہوگی، اس لئے جودلیل کبھی نبوت کے ساتھ پائی جائے اور کبھی نہ پائی جائے تو وہ نبوت پر دلیل نہ ہوگی۔"

 

شيخ الاسلام ابن تيمیہؒ دوسری جگہ اپنی رائے کا اظہار کرتے ہوئےتحریرفرماتے ہیں:

 

"وَالْآيَاتُ وَالْبَرَاهِينُ الدَّالَّةُ عَلَى نُبُوَّةِ مُحَمَّدٍ ﷺ كَثِيرَةٌ مُتَنَوِّعَةٌ. . . وَيُسَمِّيهَا مَنْ يُسَمِّيهَا مِنَ النُّظَّارِ (مُعْجِزَاتٍ) . . . وَهَذِهِ الْأَلْفَاظُ إِذَا سُمِّيَتْ بِهَا آيَاتُ الْأَنْبِيَاءِ، كَانَتْ أَدَلَّ عَلَى الْمَقْصُودِ مِنْ لَفْظِ الْمُعْجِزَاتِ. . . "  ^[10]

 

"محمدﷺ کی نبوت پردلالت کرنے والی نشانیاں اور دلائل بہت زیادہ اور متنوع ہیں، متکلمین انہیں معجزات کانام دیتے ہیں لیکن مقصود پر زیادہ صحیح دلالت کرنے والا نام "آيَاتُ الْأَنْبِيَاء" ہےکیونکہ قرآن و سنت میں اس کے لئے "الْآيَةِ، الْبَيِّنَةِ" اور "الْبُرْهَانِ" کے کلمات وارد ہوئے ہیں۔"

 

اس اقتباس سے معلوم ہوا کہ شيخ الاسلام ابن تيمیہؒ کے نزدیک "دلائل النبوَّة، اعلام النبوَّة اور المعجزات"  ان سب سے بہتر وہ نام ہیں جوخود صاحب شریعت نے استعمال کئے ہیں، لیکن متکلمین کے نزدیک معجزہ کی اصطلاح سےمراد ایک خاص قسم کی نشانی ہے جبکہ دلائل و اعلام سے ان کی مراد وہ تمام اعزازات، براہین، اخبار اور واقعات ہیں جو محمدﷺکی نبوت کی صحت اورصداقت پر دلالت کرتے ہیں اگرچہ وہ معجزہ اورخارق عادت نہ ہوں ۔

 

دلائل النبوۃ اور معجزات میں فرق

ابن حجرؒ تحریرکرتے ہیں:

 

"الْعَلَامَاتُ جَمْعُ عَلَامَةٍ وَعَبَّرَ بِهَا الْمُصَنِّفُ لِكَوْنِ مَا يُورِدُهُ مِنْ ذَلِكَ أَعَمَّ مِنَ الْمُعْجِزَةِ وَالْكَرَامَةِ وَالْفَرْقُ بَيْنَهُمَا أَنَّ الْمُعْجِزَةَ أَخَصُّ لِأَنَّهُ يُشْتَرَطُ فِيهَا أَن يتحدى النَّبِي مَنْ يُكَذِّبُهُ. . . وَيُشْتَرَطُ أَنْ يَكُونَ الْمُتَحَدَّى بِهِ مِمَّا يَعْجَزُ عَنْهُ الْبَشَرُ فِي الْعَادَةِ الْمُسْتَمِرَّةِ. . . وَسميت المعجزة لِعَجْزِ مَنْ يَقَعُ عِنْدَهُمْ ذَلِكَ عَنْ مُعَارَضَتِهَا"^[11]

 

"علامات "علامة" کی جمع ہےاور مصنفؒ نے یہ تعبیراس لئے اختیار کی ہے کہ یہ معجزہ اور کرامت سے زیادہ عام ہے ۔ ان میں فرق یہ ہے کہ معجزہ خاص ہے جس میں اپنے جھٹلانے والے کو چیلنج کرنا، خارق عادت ہونااور معارضہ کا ناممکن ہونا شرط ہے، اسی لئے اس کا نام معجزہ رکھا گیا۔"

 

اس اقتباس سے یہ معلوم ہوا کہ معجزہ کے لئے کم از کم تین شرائط ضروری ہیں: # وہ امرخارق عادت اور سنن کونیہ وطبیعیہ کے خلاف ہو۔

1. اس امر کے ساتھ مخاطب کو چیلنج کیا گیا ہو ۔

1. اس امر کامعارضہ اور مقابلہ کرنا ناممکن ہو۔

 

 

 

ان تینوں میں سے کوئی ایک شرط بھی مفقود ہوئی تو وہ معجزہ ہر گز نہیں کہلاسکتا لیکن دلیل اور نشانی بن سکتا ہے کیونکہ دلیل ِ نبوت عام ہے اورصرف معجزات میں محصور نہیں، یہی بات ابن ابی العزحنفی ؒ نے بھی کہی ہے۔^[12]

 

محمدﷺ کی نبوت کے اعلام و دلائل

تمام انبیاء و رسل میں اعلی، افضل ا ور اکمل مقام سرور کونین ﷺ کو حاصل ہے جن کی نبوت کی صداقت اور افضلیت کے دلائل و اعلام بے شمار ہیں جو محدثین، مؤرخین اور علماء سیرنے بیان کئے ہیں اور اسی نام سے مستقل کتابیں تحریر فرمائی ہیں ۔ امام ابو سعد الخرکوشیؒ اور قاضی عیاضؒ نے اسی اہمیت کی خاطر اپنی کتابوں میں خصوصیت کے ساتھ ان کو ذکر فرمایا ہے، جن میں سے چند نمایاں ترین درجِ ذیل ہیں: == حسن وجمال نبویﷺ ==

 

قاضی عیاض ؒ فرماتے ہیں آپﷺکے حسن وجمال کاتذکرہ بے شمار احادیث میں ہے جن کی صحت میں کلام نہیں بلکہ بعض اخبار توصحت سے قطعیت بلکہ حق الیقین کا درجہ حاصل کرچکے ہیں۔سرور عالمﷺ کے حسن وجمال اورتناسب ِ اعضاء کے بیان میں آثار ِ صحیحہ کثیرہ مشہورہ واردہیں۔ ایسی احادیث حضرت علی کرم اللہ وجہہ، ام معبد الخزاعیہؓ، ابن ابی ہالہؓ، انس بن مالکؓ، البراء بن عازبؓ اوردیگر کئی صحابہ کرام ؓ﷡سے مروی ہیں جن کا ماحصل پیش ہے:

 

آقائے دوعالمﷺ کارنگ اجلاتھا۔ آنکھیں سیاہ، گہری اورقدرے سرخی مائل تھیں ۔ رنگ ایساسفید تھا جوسرخی کی جانب مائل ہو۔ پلکیں لمبی تھیں ۔دونوں حاجب (بھنویں) جدااورلمبائی میں ان پر باریک بال تھے، ناک مبارک لمبی اورمنور تھی، سامنے والے دانت ایک دوسرے سے جداتھے ۔ چہرہ مبارک کسی قدر گول، پیشانی کشادہ، ریش مبارک بھاری جوسینہ اقدس کو ڈھانپ لیتی تھی۔ سینہ بے کینہ اورشکم مبارک برابررہتے تھے۔ صدرانور کشادہ اوربڑے جوڑ موٹے تھے۔ بازو، کلائیاں اورپنڈلیاں بھاری، ہاتھ پیروں کی انگلیاں موٹی اورلمبی تھیں۔ جسم پربال بہت کم تھے، سینہ مبارک سے ناف مبارک تک بالوں کی ہلکی سی دھاری تھی۔^[13]

 

فخرکون ومکان کاہنسناتبسم فرماناتھا، جب کسی کی طرف توجہ فرماتے تو پورےبدن مبارک کےساتھ متوجہ ہوتے۔کملی والےکی زلفیں شکن دار تھیں۔ جب تبسم فرماتے توبجلی کی روشنی یابادلوں کی چمک کی مانند دہن مبارک کھلتا ۔ جب کلام فرماتے تو سامنے والے اوپر اورنیچے کے دندان مبارک سے نور کی شعاؤں کے چشمے پھوٹ نکلتے تھے ۔ گردن حسین ترین تھی جوزیادہ لمبی اور نہ بہت چھوٹی تھی، چہرہ انور بالکل گول نہ تھا اور نہ ہی جسم اطہرزیادہ فربہ بلکہ پھر تیلا اورکم گوشت والا تھا۔ ^[14]

 

حضرت علی  آپؐ کایوں تذکرہ کرتےہیں:

 

". . . يَقُول نَاعِتُهُ: لَمْ أَرَ قَبْلَهُ وَلَا بَعْدَهُ مِثْلَهُ "^[15]

 

". . . حضورؐ کی صفت بیان کرنے والاصرف یہی کہہ سکتاہے: میری (آنکھوں) نے ایسا باجمال وباکمال نہ ان سے پہلے دیکھا اور نہ ان کےبعد ۔"

 

جسمانی محاسن، کمالات و امتیازات

ا ـ سامنے اور پیچھے سے دیکھنا

قاضی عیاض ؒ نے حضر ت مجاہد تابعی ؒ کی یہ مرسل خبر ذکر کی ہے کہ جب رسول خدا نماز کے لئے کھڑے ہوتے توجس طرح آگے کی چیزوں کو دیکھتے تھے پیچھے کی چیزیں بھی اسی طرح آپ کونظر آتی تھیں اور ارشادباری تعالیٰ "وَتَقَلُّبَكَ فِي السَّاجِدِينَ"^[16] کی تفسیر بھی یہی بیان کی گئی ہے۔^[17]

 

صحیح بخاری ؒ میں حضرت انس ﷛سے مروی ہے:

 

"إِنِّي لَأَرَاكُمْ مِنْ وَرَائِي كَمَا أَرَاكُمْ"^[18]

 

"میں تمہیں پیچھے سے بھی ایسے دیکھتا ہوں جیسے آگے سے دیکھتا ہوں۔"

 

ب ـ بے پناہ قوت وطاقت

رسول کریمﷺکی قوت و طاقت کے حوالہ سے قاضی عیا ض ؒ فرماتے ہیں:

 

"وَقَدْ جَاءَتِ الأَخْبَارُ بِأنَّهُ صَرَعَ رُكَانَةَ أَشَدَّ أَهْلِ وَقْتِهِ" ^[19]

 

"یہ بھی احادیث میں آیاہے کہ آپ ﷺ نے رُكَانَۃ کوپچھاڑا، جواپنے وقت کا زبردست پہلوان تھا۔"

 

اس روایت سے یہ ثابت ہوتاہےکہ محبوب خدانے کشتی فرمائی اور اپنے طاقتور ترین حریف پر غلبہ حاصل کیا جو ان کی نبوت کی علامت ہے۔

 

ج ـ تیز رفتارچال

حضرت ابوہریرہ ؓ ﷛فرماتے ہیں:

 

"مَا رَأَيْتُ أَحَدًا أَسْرَعَ فِي مِشْيَتِهِ مِنْ رَسُولِ اللَّهِ ﷺ كَأَنَّمَا الْأَرْضُ تُطْوَى لَه إِنَّا لَنُجْهِدُ أَنْفُسَنَا وَإِنَّهُ لَغَيْرُ مُكْتَرِثٍ" ^[20]

 

"میں نے رسول اکرم ﷺ سےزیادہ تیز چلتے ہوئے کسی کو نہیں دیکھا گویا زمین ان کے واسطے لپٹی جاتی تھی (کہ ابھی چند منٹ ہوئے یہاں تھے اورابھی وہاں) ۔ ہم ساتھ چلتے وقت مشقت اور دشواری سے ان کی رفتار کو پہنچتے جبکہ وہ بے پرواہی سے اپنی عام چال چلتے تھے ۔"

 

د ـ لمبا اور اونچا نظر آنا

آنحضرتﷺکا قد مبارک میانہ تھا یعنی نہ بہت لمبے تھے اورنہ پست قد لیکن لمبے قدوالا آدمی بھی اگر آپ کے ساتھ چلتا تو دیکھنے والے کوآپ ہی اونچے محسوس ہوتے تھے ۔ ابو ہریرہ فرماتے ہیں:

 

"ما مشي رسول الله صلى الله عليه وسلم مع أحد إلا طاله"^[21]

 

" جو کوئی بھی معیت میں چلتا تو آپ ﷺ اس سے زیادہ طویل نظر آتے تھے۔"

 

ھ ـ رعب ودبدبہ

حضرت علی سرور کائناتﷺ کے رعب و دبدبہ کے متعلق فرماتے ہیں:

 

" مَنْ رَآهُ بَدِيهَةً هَابَهُ، وَمَنْ خَالَطَهُ مَعْرِفَةً أَحَبَّهُ"^[22]

 

" جو شخص آقا علیہ السلام کو اچانک دیکھتا مرعُوب ہوجاتا تھا (یعنی وقار، رعب اور دبدبہ اتنا زیادہ تھا کہ پہلی نظر میں دیکھنے والا رُعب کی وجہ سے ہیبت میں آجاتا تھا) ، اور جس شخص کی شناسائی ہوجاتی اور گھل مل جاتا تھا تو وہ اپنامحبوب بنالیتاتھا"۔

 

اللہ تبارک وتعالیٰ نے اپنے حبیب کوجس ہیبت اوررعب ودبدبے سے نوازاتھااسی کااظہار حضرت ابوہریرہ کی اس صحیح حدیث میں بھی ہے:

 

" فُضِّلْتُ عَلَى الْأَنْبِيَاءِ بِسِتٍ: . . . وَنُصِرْتُ بِالرُّعْبِ"^[23]

 

رسول اللہ ﷺکا ارشاد ہے: "مجھے باقی سب انبیاء پر چھ چیزوں میں برتری وفضیلت سے نوازا گیا ہے. . . اورمیر ی مدد رعب اوردبدبے سے کی گئی ہے ۔"

 

و ـ جسم اطہرسے خوشبو آنا

قاضی عیاض ؒ نے فخرِ کونین کےجسم اطہر کی نظافت او ر پاکیزگی اورپسینے کی خوشبو کے حوالے سے بہت سے خصائص ذکر کئے ہیں ۔وہ حضرت انس  سے درج ذیل حدیث نقل کرتے ہیں:

 

". . . وَلَا شَمِمْتُ مِسْكَةً وَلَا عَنْبَرَةً أَطْيَبَ مِنْ رَائِحَةِ رَسُولِ اللهِ ﷺ" ^[24]

 

". . . اور میں نے اللہ کے پیغمبر کے جسم مطہر کی خوشبو سے زیادہ عمدہ اور بہترین کسی مشک و عنبر کی خوشبو کو بھی نہیں پایا۔"

 

علامہ ابن حجرؒ حدیث کی شرح کرتے ہوئے تحریر کرتے ہیں "شَمِمْتُ"کے لفظ کو پہلے میم کے کسرہ اور فتحہ دونوں طرح پڑھنا درست ہے جبکہ دوسرا میم ساکن ہے ۔^[25]

 

امام ابو سعد خرکوشی ؒنے جسم اطہر کےپسینہ اور بہترین خوشبو کے بارے میں پوری ایک فصل قائم کی ہے جس کا عنوان ہے: "فصل: ذكر الآية في عرقه، وما جاء في طيب ريحه (صلى الله عليه وسلم) "^[26] اس فصل میں انہوں نے حضرت انس بن مالكؓ، جابر بن عبد اللہ اور جابر بن سمرة  سے احادیث نقل کی ہیں۔== اعلی واشرف حسب ونسب ==

 

تمام انبیاء علیھم السلام اپنے معاشرہ کے سب سے زیادہ شریف النسب لوگ ہوتے ہیں اور آ پ ﷺتو پوری انسانیت میں سب سے اشرف و اعلیٰ نسب کے مالک ہیں جس کا تذکرہ خود رسول اللہﷺنے کئی احادیث میں کیاہے۔

 

حضرت عباس ﷛سے روایت ہے کہ نبیءکریم ﷺنے فرمایا:

 

" إِنَّ اللَّهَ خَلَقَ الخَلْقَ فَجَعَلَنِي مِنْ خَيْرِهِمْ. . .، فَأَنَا خَيْرُهُمْ نَفْسًا، وَخَيْرُهُمْ بَيْتًا"^[27]

 

"بے شک اللہ تعالیٰ نے مخلوق کو پیدافرمایاتومجھےبہترین لوگوں اوربہترین جماعت میں پیدا فرمایا۔۔۔، پس میں ذاتی طور پر اورگھر و خاندان کے اعتبار سے سب لوگوں میں اعلی و ارفع اور افضل ہوں۔"

 

حضرت واثلۃؓ بن اسقع ﷛ سے یہ صحیح حدیث مروی ہے:

 

"إن اللَّهَ اصْطَفَى مِنْ وَلَدِ إِبْرَاهِيمَ إِسْمَاعِيلَ وَاصْطَفَى مِنْ وَلَدِ إِسْمَاعِيلَ بَنِي كِنَانَةَ وَاصْطَفَى مِنْ بَنِي كِنَانَةَ قُرَيْشًا وَاصْطَفَى مِنْ قُرَيْشٍ بَنِي هَاشِمٍ وَاصْطَفَانِي مِنْ بَنِي هَاشِمٍ"^[28]

 

"بے شک اللہ تعالیٰ نے حضرت ابراہیمؑ کی اولاد میں سے حضرت اسماعیلؑ کوچنااوران کی نسل سے بنی کنانہ کواور کنانہ کی اولاد سے قریش کو اورقریش میں سے بنی ہاشم کواوربنی ہاشم میں سے مجھے چناہے ۔"

 

حضرت انس ؓ﷛نے آپ ﷺ کا یہ فرمان نقل کیا ہے:

 

"أَنَا أَكْرَمُ وَلَدِ آدَمَ عَلَى رَبِّي وَلَا فَخْرَ" ^[29]

 

"میں اپنے رب کے نزدیک تمام بنی آدم سے بڑھ کرعزت و تکریم والا ہوں اور میں اس پر فخر نہیں کرتا ۔"

 

نسب اطہر میں حضرت آدم ؑسے شروع ہوکرحضورؐکے والد گرامی تک سب ہی آپس میں شرعی و قانونی رشتۂ ازدواج میں منسلک تھے اور کسی کا بھی نا جائز تعلق نہیں تھا، یہی اس فرمان نبوی کا مفہوم ہے:

 

"وُلِدْت مِنْ نِكَاحٍ لَا مِنْ سِفَاحٍ لَمْ يُصِبْنِي مِنْ نِكَاحِ الْجَاهِلِيَّةِ شَيْءٌ"^[30]== مکارم اخلاق ==

 

تمام انبیاء علیھم السلام اعلیٰ و ارفع اخلاق کے مالک ہوتے ہیں لیکن حضورﷺ کا تو اعلیٰ ترین وصف ہی مکارم اخلاق کا حامل ہونا ہے، قاضی عیاض ؒ فرماتے ہیں:

 

"وَهِيَ الَّتِي جِمَاعُهَا: حُسْنُ الْخُلُقِ"^[31]

 

"تمام صفات حسنۃ اور جملہ خوبیوں کا جامع حُسنِ خُلُق ہے۔"

 

اللہ تبارک وتعالیٰ نے بھی اسی صفت سے تعریف فرماتے ہوئے ارشادفرمایا:

 

"وَإِنَّكَ لَعَلَى خُلُقٍ عَظِيمٍ"^[32]

 

"اور بلاشبہ آپﷺعظیم اخلاق کے اعلی درجے پرفائز ہیں۔"

 

اور خود رسول کریمﷺ نے اپنے متعلق فرمایا:

 

"إِنَّمَا بُعِثْتُ لِأُتَمِّمَ مَكَارِمَ الْأَخْلَاقِ" ^[33]

 

"مجھےاسی لئے بھیجا گیا ہے کہ میں محاسن اخلاق کی تکمیل کروں۔"

 

قاضی عیاض ؒ محسن انسانیت کےمکارم اخلاق کےمتعلق تحریر فرماتے ہیں:

 

"محمدﷺکےاخلاق کریمانہ کی مکمل آگہی اورعلم اسی ذات اقدس کو ہے جس نے انہیں ان اخلاق فاضلہ سے نوازا، فضیلت بخشی اور آخرت میں آپ ﷺ کوایسے اعلی درجات ومقامات عطا فرمائیں گے جو عقل انسانی سے ماورا ہیں، جہاں ظن وتخمین اور انسانی خیال تک کی رسائی ممکن نہیں۔"^[34]== سیرت طیبہ بطور دلیل نبوت ==

 

قاضی عیاض ؒ لکھتےہیں: بلاشبہ رسول اکرمﷺ سب سےزیادہ عقلمند اورذہین وفطین تھے ۔آپ ﷺنےاپنی رسالت کی صداقت پر سیرت طیبہ کو خود بطور دلیل پیش فرمایا، ارشاد ربانی ہے:

 

"فَقَدْ لَبِثْتُ فِيكُمْ عُمُرًامِنْ قَبْلِهِ أَفَلَا تَعْقِلُونَ"^[35]

 

" آخر اس سے قبل بھی زندگی کا بڑا حصہ میں تمہارے درمیان گذارچکا ہوں۔ کیا تم پھر بھی نہیں سمجھتے ؟"

 

محسن بشریت نے جب اسلام کی دعوت دینا شروع کی تو صورت حال یہ تھی کہ لوگ دیوانہ اور مجنون سمجھ رہے تھے ۔

 

"ثُمَّ تَوَلَّوْا عَنْهُ وَقَالُوا مُعَلَّمٌ مَجْنُونٌ"^[36]

 

"پھر ان سب نے رسول سے منہ پھیر لیا اور کہا (یہ تو) سکھایا ہوا (اور) سودائی ہے۔"

 

لیکن دنیا سے رحلت فرماتے وقت یہی شخصیت جزیرۃ العرب کی بلا منازع مالک و حاکم تھی صرف 23 سال میں آپ ﷺنےعلمی، سیاسی، معاشی، معاشرتی، روحانی اوراخلاقی ہر حوالے سے ایک عظیم انقلاب برپا فرمادیا جو سیرت طیبہ کا عظیم معجزہ ہے ۔

 

قاضی عیاضؒ نےوہب بن منبہ ؒ کا یہ قول نقل کیا ہے:

 

"قَرَأْتُ فِي أَحَدٍ وَسَبْعِينَ كِتَابًا فَوَجَدْتُ فِي جَمِيعِهَا أَنَّ النَّبِيَّ ﷺ أَرْجَحُ النَّاسِ عَقْلًا وأَفْضَلُهُمْ رَأْيًا"^[37]

 

"میں نے اکہتر (71) کتابیں پڑھی ہیں سب کے اندر یہی لکھا ہواپایا کہ آپﷺسب انسانوں سےزیادہ عقلمند اور افضل وصائب رائے والے ہیں۔"

 

امام ابن حزمؒ آپ ﷺ کی پاکیزہ زندگی کے متعلق فرماتے ہیں:

 

"فَإِن سيرة مُحَمَّد ﷺ لمن تدبرها تَقْتَضِي تَصْدِيقه ضرورةً. . . فَلَو لم تكن لَهُ معْجزَة غير سيرته ﷺ لكفى وَذَلِكَ أَنه عَلَيْهِ السَّلَام نَشأ كَمَا قُلْنَا فِي بِلَاد الْجَهْل لَا يقْرَأ وَلَا يكْتب. . . "^[38]

 

"محمدﷺکی حیات مبارکہ کا جو شخص بغور جائزہ لے گاوہ ضرور آپ کے نبی ہونے کی تصدیق کرے گاکیونکہ سیرت طیبہ اس بات کی شاہد ہے کہ آپ ﷺاللہ تبارک وتعالی کے سچے پیغمبرتھے ۔ اس پاکیزہ زندگی کے سوا اگر کوئی اور معجزہ نہ بھی ہوتا تب بھی سیرت طیبہ بطور معجزہ کافی تھی، کیونکہ آپﷺنےایسی جگہ پرورش پائی اور پروان چڑھے جہاں پڑھنے لکھنے کا تصورنہ تھا ۔"== امیّت علامت نبوت ==

 

نبوت کے دلائل و اعلام میں سے یہ بھی ہے کہ آپ ﷺامی وناخواندہ تھے اور خط وکتابت نہیں جانتے تھے۔ اللہ تعالیٰ کاارشاد ہے:

 

"وَمَا كُنْتَ تَتْلُو مِنْ قَبْلِهِ مِنْ كِتَابٍ وَلَا تَخُطُّهُ بِيَمِينِكَ إِذًا لَارْتَابَ الْمُبْطِلُونَ"^[39]

 

" اور اس سے پہلے آپ کوئی کتاب نہیں پڑھتے تھے اور نہ اپنے داہنے ہاتھ سے لکھتے تھے، اگر ایسا ہوتا تو اہل باطل شک میں پڑجاتے۔"

 

آپ علیہ السلام اس قوم میں پیداہوئےجوتمام کی تمام امی اورناخواندہ تھی اور نشوونمااس شہر اوران لوگوں میں ہوئی جن میں گزشتہ علوم کاجاننے والاکوئی بھی نہ تھااورنہ ہی کسی ایسے شہر کی طرف سفر فرمایاجس میں کوئی عالم ہوتااورآپ ﷺاس سے علم حاصل کرتے اورتوریت، انجیل اورگزشتہ امتوں کے اخبار وحالات جان سکتے لیکن پھر بھی ہرفریق اور جماعت سے ایسی حجت فرمائی کہ اگر جہاں بھرکے تمام عالم ونقاد جمع ہوجاتے توبھی اس کی مثل کوئی دلیل نہ لاسکتے ۔ یہ اس امر پرواضح برہان ہے کہ آنحضرتﷺکے پاس جوکچھ تھا وہ اللہ تعالیٰ کی طرف سے تھاکیونکہ بغیر تعلم واکتساب علم کے حضور ﷺعلم ومعرفت کے جس اعلیٰ مرتبے پرفائز تھے علوم اولین وآخرین اس کے سامنے ہیچ ہیں ۔ ارشاد ربانی ہے:

 

"هُوَ الَّذِي بَعَثَ فِي الْأُمِّيِّينَ رَسُولًا مِنْهُمْ يَتْلُو عَلَيْهِمْ آيَاتِهِ وَيُزَكِّيهِمْ وَيُعَلِّمُهُمُ الْكِتَابَ وَالْحِكْمَةَ وَإِنْ كَانُوا مِنْ قَبْلُ لَفِي ضَلَالٍ مُبِينٍ"^[40]

 

"وہی اللہ ہے جس نے ناخواندہ لوگوں میں انہی میں سے ایک پیغمبر کو بھیجا جو ان کے سامنےاس کی آیتوں کی تلاوت کرتا ہے، ان کو پاکیزہ بناتا ہے اور انہیں کتاب و حکمت کی تعلیم دیتا ہے، جبکہ وہ قبل اس کے صریح گمراہی میں پڑے تھے۔"

 

اسی طرح یہ حقیقت بھی قابل التفات ہے کہ وہ لوگ جوجہل ونادانی اورفسق وفجور کے اسفل سافلین میں پڑے ہوئے تھے، وہ حضورﷺکی صحبت، تعلیم اورتربیت کی وجہ سے علم وعمل کے اعلیٰ علیین پرپہنچ گئے۔یہ واضح اور روشن دلیل ہے کہ آپ ﷺ اللہ تعالی کے سچے نبی ورسول ہیں۔== سابقہ کتب سماویہ میں تذکرہ ==

 

گذشتہ آسمانی کتابوں میں بھی رسول اللہ ﷺکا تذکرہ موجود ہےجس کی تائید قرآن کریم کی اس آیت کریمہ سے ہوتی ہے:

 

"الَّذِينَ يَتَّبِعُونَ الرَّسُولَ النَّبِيَّ الْأُمِّيَّ الَّذِي يَجِدُونَهُ مَكْتُوبًا عِنْدَهُمْ فِي التَّوْرَاةِ وَالْإِنْجِيلِ"^[41]

 

"جو اس پڑھنا لکھنا نہ جاننے والے پیغمبر کے پیچھے چلیں گے جس کا ذکر وہ اپنے پاس تورات اور انجیل میں لکھا ہوا پائیں گے۔"

 

امام ابو سعد خرکوشی ؒ نے اس حوالہ سے اپنی کتاب میں جامع ابواب بشائرہﷺمیں دو فصلیں قائم کی ہیں، جس میں اپنی سند کے ساتھ عبد اللہ بن سلام ﷛سے ایک طویل حدیث نقل کی ہے، اس کا خلاصہ یہ ہے کہ بنی اسرائیل میں ایک شخص أوشا نام کا تھا جوتورات کا بہت بڑا عالم تھاجسےآنحضرتﷺاور ان کی امت کی نعت اور صفات تورات سے معلوم ہوگئی تھیں لیکن اس نے اس وصف کو تورات سے علیحدہ اور جداکرکے اپنےخزانوں میں لوہے کے ایک تابوت میں تالا لگا کر چھپا دیا تھا جسے اس کے بیٹے بلوقیا نے اس کے مرنے کے بعد ظاہر کیا۔^[42]

 

اسی طرح حضرت عبد اللہ بن عباس ﷟ سے یہ روایت بھی نقل کی ہے:

 

"اللہ تعالی نے حضرت عیسی ؑ کی طرف وحی کی: اے عیسی محمد ﷺپر ایمان لے آؤ اور جو کوئی تمہاری امت میں سے انہیں پائے، اسے بھی حکم دیں کہ وہ حضرت محمد ﷺ پر ایمان لائے، اگر محمد نہ ہوتے تو میں آدم کی تخلیق نہ کرتا اور اگر محمد نہ ہوتے تو میں نہ جنت کو پیدا نہ کرتا اور نہ ہی دوزخ کو ۔"^[43]== ارهاصات ==

 

" (رَهَصَ- الرَّهْصُ) الرَّاءُ وَالْهَاءُ وَالصَّادُ أَصْلٌ يَدُلُّ عَلَى ضَغْطٍ وَعَصْرٍ وَثَبَاتٍ. . . شِدَّةُ الْعَصْرِ"^[44]

 

"ابن فارس فرماتے ہیں راء، ھاء اور صاد کا مادہ دبانے، سخت نچوڑنے، ثبات اور مضبوطی کے معانی کے لئے استعمال ہوتا ہے۔ "

 

ابن تیمیہؒ تحریر کرتے ہیں:

 

"الإرهاص هو المقدّمة للشيء. . . والإرهاص اصطلاحاً: ما يَصدُرُ من النبيّ قبل النبوةِ من أمرٍ خارق لِلعادةِ تمهيداً لها"^[45]

 

"الإرهاص: وہ چیز جوکسی دوسری چیز کیلئے مقدمہ ہو اور اس کی اطلاع دیتی ہو۔اور اصطلاحاً اس سے مراد وہ انہونے واقعات ہیں جو کسی نبی سے اس کی بعثت سے پہلے نبوت کی تمہید کےطور پرظا ہر ہوتے ہیں۔"

 

علامہ جرجانی ؒ اس کی اصطلاحی تعریف کرتے ہوئے فرماتے ہیں:

 

"الإرهاص: إحداث أمرخارق للعادة دال على بعثة نبي قبل بعثته"^[46]

 

"اللہ تعالی کی طرف سے نبی کے ظہور سے قبل ایسے انہونےواقعہ کا ظاہرہونا جواس کی بعثت پردلالت کرے۔"

 

امام ابو سعد الخرکوشیؒ لکھتے ہیں کہ رسول اللہﷺکی بعثت سے قبل بے شمار ایسے واقعات پیش آئے جو اس بات کی علامت اور پیش خیمہ تھے کہ کوئی عظیم واقعہ پیش آنے والا ہے جیسےاصحاب فیل کا واقعہ وغیرہ۔^[47] انہوں نے اپنی کتاب" شرف المصطفى" میں حضورﷺ کےدلائل اور نبوت کی علامات پر کئی فصول قائم کی ہیں۔^[48]

 

اسی طرح قاضی عیاضؒ نے بھی کئی فصول قائم کی ہیں جن میں آپ ﷺکی نبوت کے دلائل واعلام اور ارہاصات ہیں جو آپ ﷺ کی ولادت مبارکہ کے وقت ظاہر ہوئے اوروہ عجائب وغرائب بھی ہیں جو رسول اللہﷺ کی والدہ محترمہ اور ان لوگوں سے منقول ہیں جواس مبارک موقعہ پر موجود تھےجن میں صحیح وسقیم دونوں قسم کی روایات ہیں۔^[49]== آسمانوں کا شیاطین سے تحفظ ==

 

محمدﷺ کی بعثت سے پہلے جنات اور شیاطین آسمانوں پر آزادانہ آیا جایا کرتے تھےاور وہاں سے کوئی ایک بات سن لیتے جس کے ساتھ نو جھوٹ ملا کر آگے پھیلاتے لیکن آپ ﷺ کی بعثت سے قبل آسمانوں میں تحفظ کے نظام کو زیادہ سخت کر دیا گیا جس سے ان کیلئےاب کوئی بات سننابہت زیادہ دشوار ہو گیا اور اگر کوئی سننے کی کوشش کرتا تو شہابِ ثاقب اس کے تعاقب میں ہوتا۔ اسی کے متعلق سورۃ الجن کی یہ آیت کریمہ ہے:

 

"وَأَنَّا لَمَسْنَا السَّمَاءَ فَوَجَدْنَاهَا مُلِئَتْ حَرَسًا شَدِيدًا وَشُهُبًا وَأَنَّا كُنَّا نَقْعُدُ مِنْهَا مَقَاعِدَ لِلسَّمْعِ فَمَنْ يَسْتَمِعِ الْآنَ يَجِدْ لَهُ شِهَابًا رَصَدًا وَأَنَّا لَا نَدْرِي أَشَرٌّ أُرِيدَ بِمَنْ فِي الْأَرْضِ أَمْ أَرَادَ بِهِمْ رَبُّهُمْ رَشَدً"^[50]

 

"اور بلاشبہ ہم نے آسمان کی تلاشی لینا چاہا تو ہم نے اسے اس حال میں پایا کہ وہ مضبوط چوکیداروں اور شعلوں سے بھرا ہوا ہے۔ اور بے شک ہم پہلے وہاں بہت سی جگہوں میں (خبریں) سننے کے لیے بیٹھا کرتے تھے، اب اگر کوئی سننا چاہے تو اپنےواسطے شعلہ تیار پائے۔ اور یقیناً ہمیں معلوم نہیں کہ اس سے زمین والوں کے حق میں برائی مقصود ہے یا ان کے پروردگار نے ان کی بھلائی کا ارادہ فرمایا ہے۔"

 

اس حوالے سےقاضی عیاض ؒ فرماتے ہیں:

 

"وَمِنْ ذَلِكَ حِرَاسَةُ السَّمَاءَ بِالشُّهُبِ وَقَطْعُ رَصَدِ الشَّيَاطِين وَمَنْعُهُم اسْتِرَاقَ السَّمْعِ"^[51]

 

"محمدﷺ کی نبوت کی علامات ودلائل میں سے یہ بھی ہے کہ آسمانوں کی حفا ظت کا نظام آگ کے شعلوں یعنی شہابِ ثاقب کے ذریعہ سخت اور محفوظ کردیا گیا اور شیاطین کا تاک لگاکر گھات میں بیٹھ کر آسمانوں کی باتوں کو چوری چھپے سننے سے روک دیا گیا۔"

 

امام ابو سعد الخرکوشی نےبھی اس بابت پوری ایک فصل قائم کی ہے۔^[52] == ختم اور مہر نبوت ==

 

نبوت کی ایک ظاہری علامت اور نشانی یہ بھی تھی کہ رسول اللہ ﷺ کے دونوں شانوں کے درمیان "مہرنبوت "تھی ۔ جو آپﷺ کی صداقت اور سچائی پر دلالت کرتی تھی ۔یہ مہرنبوت کیسی تھی، اس کی شکل وصورت کیا تھی اور اس پر کیا تحریر تھا اس کے متعلق احادیث میں مختلف الفاظ وارد ہوئے ہیں ۔ امام بخاریؒ مہر نبوت کےحوالے سےالسائب بن یزید سےروایت کرتے ہیں:

 

"يَقُولُ: ذَهَبَتْ بِي خَالَتِي إِلَى النبي ﷺ، . . . ثُمَّ قُمْتُ خَلْفَ ظَهْرِهِ فَنَظَرْتُ إِلَى خَاتَمِ النُّبُوَّةِ بَيْنَ كَتِفَيْهِ، مِثْلَ زِرِّ الْحَجَلَةِ" ^[53]

 

"میری خالہ مجھے حضور ﷺ کے پاس لے گئیں، ۔۔۔ پھر میں آپ ﷺ کی پشت کی جانب کھڑا ہوا تو میں نے آپ ﷺ کے دونوں کندھوں کے درمیان مہرِ نبوت دیکھی جو "مسہری کی گھنڈیوں" جیسی تھی۔"

 

"امام بخاری ؒ نے آپ ﷺ کی مہر نبوت کو "مِثْلَ زِرِّ الْحَجَلَةِ" کہاہے جس کاترجمہ مولانازکریاکاندھلویؒ نے "مسہری کی گھنڈیوں" (جوکبوتر کے بیضہ کے برابربیضوی شکل میں اس پردے میں لگی ہوئی ہوتی ہے جومسہری پرلٹکایاجاتاہے) سے کیا ہے۔"^[54]

 

مہرنبوت کے وصف میں جابر بن سمرۃؓ ﷛سے ایک جملہ "غُدَّةً حَمْرَاءَ مِثْلَ بَيْضَةِ الْحَمَامَةِ "^[55] یعنی "سرخ رسولی جیسی (اورمقدار میں) کبوتر کے انڈے جیسی" منقول ہے ۔"

 

اسی کے متعلق مولانا زکریا کاندھلویؒ فرماتے ہیں:

 

"مہر نبوت کی مقدار اور رنگ میں روایتیں کچھ مختلف ہیں۔ قرطبیؒ نے ان میں اس طرح تطبیق دی ہےکہ وہ کم وزیادہ بھی ہو جاتی تھی اور رنگ میں مختلف ہوتی رہتی تھی، ^[56] بندہ نا چیز کے نزدیک دوسری طرح جمع یہ بھی ممکن ہے کہ فی الحقیقت یہ سب تشبیہات ہیں اور تشبیہ ہر شخص کی اس کے ذہن کے موافق ہوتی ہے جو تقریبی حالت ہوتی ہے اور تقریب کے اختلاف میں اشکال نہیں ہوتا۔بندہ کے نزدیک یہ توجیہ زیادہ مناسب ہے۔"^[57]

 

مولانازکریا ؒ کی یہی توجیہ زیادہ مناسب اور صحیح نظر آتی ہے۔== فصاحت وبلاغت ==

 

عرب اپنے مقابلے میں دیگر تمام انسانوں کوعجم (گونگے) کہتے تھے کہ ان کو بولنا نہیں آتا، زبان دانی صرف انہی کی خاصیت ہے اور اس میں بالکل مبالغہ نہیں تھاکیونکہ یہ ایک مسلمہ حقیقت ہے کہ عرب کا بچہ بچہ فصیح و بلیغ تھا۔

 

قاضی عیاض ؒ آپﷺ کی فصاحت وبلاغت کے متعلق تحریر فرماتے ہیں:

 

"وَأَمَّا فَصَاحَةُ اللِّسَانِ وَبَلاغَةُ الْقَوْلِ فَقَدْ كَانَ صَلَّى اللَّهُ عَلَيْهِ وَسَلَّمَ مِنْ ذَلِكَ بِالْمَحَلِّ الْأَفْضَلِ. . . وَنَصَاعَةَ لَفْظٍ وَجَزَالَةَ قَوْلٍ وَصِحَّةَ مَعَانٍ. . . فَكَانَ يُخَاطِبُ كُلَّ أُمَّةٍ مِنْهَا بِلِسَانِهَا وَيُحاوِرُهَا بِلُغَتِهَا"^[58]

 

" زبان وبیان میں رسول اللہﷺ کی شان بلحاظ فصاحت وبلاغت اتنی بلندی پر ہے کہ آپ ﷺ کے اس امتیاز سےکوئی سلیم الطبع بے خبر نہیں ہے، کسی بلند ہمت، کم گو، فصیح البیان، ماہر علم وفن، غواص معانی اورتکلف سے بچنے والے پر یہ امر مخفی نہیں ہےکہ نبی کریم ﷺ کوجامع کلمات عطا کئے گئے اورانمول حکمتوں کے ساتھ خصوصیت بخشی گئی عرب کی ساری زبانیں سکھائی گئیں، اسی لیے آپﷺ عرب کے ہرقبیلے والوں سے ان کی بولی میں کلام فرماتے اوران کی روز مرہ بول چال کابلاغت کے ساتھ لحاظ رکھتے تھے ۔"

 

جوکوئی بھی اللہ کے رسولﷺ کی گفتگو اوربرتاؤ میں تامل و تدبر کرے گا، اس پر ذکر کردہ اقتباس کی صداقت بخوبی واضح ہوجائے گی ۔

 

ایک مرتبہ بعض صحابہ کرامؓ نےعرض کیا: یارسول اللہ ﷺ آپ سے بڑھ کر فصیح ہم نے کسی کو نہیں دیکھا، فخر دوعالم ﷺ نے جواباً فرمایا:

 

"وَمَا يَمْنَعُنِي وَإِنَّمَا أُنْزِلَ الْقُرْآنُ بِلِسَانِي لِسَانٍ عَرَبِيٍّ مُبِينٍ"^[59]

 

"فصاحت وبلاغت سے میرے لئے کون سی چیز مانع ہے جب کہ قرآن کریم میری زبان میں نازل ہواہے جوصاف عربی زبان ہے ۔"

 

ا یک دوسرے موقع پر آپﷺ نےارشاد فرمایا:

 

"أَنَا أَفْصَحُ الْعَرَبِ بَيْدَ أَنِّي مِنْ قُرَيْشٍ وَنَشَأْتُ فِي بني سعد"^[60]

 

"میں عرب کاسب سے فصیح ہوں کیونکہ میری پیدائش قریش میں اور پرورش بنی سعد میں ہوئی ہے۔"

 

اسی لئے رسول اکرم ﷺ کی زبان میں شہریوں کی شیرینی، اور دیہات والوں کی زبان کی فخامت وعظمت اور الفاظ کی درستگی، دونوں ہی چیزیں جمع تھیں ۔

 

حضرت ام معبد^[61]نے آپﷺ کےکلام کی توصیف میں فرمایا:

 

"حُلْوُ الْمَنْطِقِ فَصْلٌ لَا نَزْرٌ وَلَا هَذْرٌ كَأَنَّ مَنْطِقَهُ خَرَزَات نُظِمْنَ. وَكَانَ جَهِيرَ الصَّوْتِ حَسَنَ النَّغَمَةِ ﷺ"^[62]

 

"رسول اللہ ﷺ کاکلام شیریں ہوتاتھا، گفتگو کاہر لفظ دوسرے سے جداہوتا، نہ مراد ومفہوم سے کم اور نہ زیادہ ہوتا ۔بغیر ضرورت کلام نہیں فرماتے تھے ۔ آپ ﷺ کی بات چیت ایسے مربوط ہوتی جیسےموتی ایک لڑی میں پرود یئے ہوں اور آواز بلند و دلکش تھی ۔"== معجزات ==

 

اللہ تبارک و تعالیٰ نے رسول اللہ ﷺ کو بے شمار معجزات عنایت فرمائے ۔ ابن تیمیہ ان کی تعداد کے متعلق فرماتے ہیں:

 

وَمُعْجِزَاتُهُ تَزِيدُ عَلَى أَلْفِ مُعْجِزَةٍ، . . . وَمِثْلَ الْقُرْآنِ الْمُعْجِزِ، . . . وَبِشَارَةِ الْأَنْبِيَاءِ بِهِ. . ^[63]

 

"محمدﷺ کےمعجزات ایک ہزار سے زائدہیں ۔۔۔ جیسے چاند کا دو ٹکڑے ہونا، ۔۔۔ اور سابقہ انبیاء کا رسول اللہﷺ کی بشارت اور خوشخبری دیناوغیرہ ۔۔۔ "

 

ان معجزات میں سے چند مختصراً تحریر کیے جاتے ہیں:

 

حضرت جابر ﷛کے گھر میں غزوہ خندق کے موقعہ پر ایک صاع جَو (تقریبا ساڑھے تین کلو) اور ایک بکری میں آنحضرتﷺ نے اپنا لعاب دہن ملایا اور برکت کی دعا فرمائی جس سے ایک ہزار (وَهمْ الْفٌ) لوگوں نے کھانا کھایا اور وہ اسی طرح باقی رہا ۔^[64]

 

آپ ﷺنے حدیبیہ کے موقعہ پر خشک کنویں کے اندر اپنا لعاب مبارک ڈالاتووہ پانی سے بھرگیااورچودہ سو (۱۴۰۰) لوگوں کو سیراب کردیا۔^[65]

 

سرور کائناتﷺ نے وفد نجران کے عیسائیوں کودعوت مباہلہ دی اوران سے کہاکہ آؤ اپنے اوپر بددعاکرتے ہیں مگر ساتھ ہی یہ بھی بتادیا کہ اگر تم ایساکرو گے توہلاک ہوجاؤگے ۔اس لئے وفد نجران کے عیسائیوں نے دعوت مباہلہ قبول نہیں کی بلکہ ان کا یوں کہنا "فَقَالَ أَحَدُهُمَا لِصَاحِبِهِ: لَا تُلَاعِنْهُ، فَوَاللهِ لَئِنْ كَانَ نَبِيًّا فَلَاعَنْتَهَ لَا نُفْلِحُ نَحْنُ وَلَا عَقِبُنَا مِنْ بَعْدِنَا"^[66] رسول اللہ ﷺ کی سچائی کی بہت بڑی دلیل ہے۔

 

حضرت جابر بن عبداللہ ؓ﷛سے روایت ہے:

 

"رسول اللہﷺنے ایک درخت کو ٹہنی سے پکڑا اور اسے کہا: اللہ کے حکم سے میرے آگے چلو۔ پھر دوسرے درخت کی ٹہنی پکڑی اور اسے بھی یہی کہا۔ جب دونوں اکٹھے ہوگئے تو آپ ﷺ نے ان کی اوٹ میں قضائے حاجت فرمائی، پھر ان کوحکم دیا تو وہ واپس اورعلیحدہ ہو گئے۔"^[67]

 

نبیٔ اکرم ﷺ کی نبوت کی ایک دلیل اور معجزہ یہ بھی ہے کہ آپ علیہ الصلاۃ والسلام نے ابی بن خَلَف الجمحی سے کہاتھاکہ تمہیں میں قتل کروں گا۔غزوہ اُحد میں آپ ﷺنے اسے ہلکاسا زخم گردن میں لگایا "فَطَعَنَهُ فِي عُنُقِهِ" جس کی وجہ سے اس کی موت واقع ہوگئی۔^[68]

 

یہ اوراس طرح مزید بے شمار علامات، دلائل اور معجزات ہیں جوآپ صلی اللہ علیہ وسلم کی نبوت کی صداقت اور حقانیت پر دلالت کرتے ہیں۔^[69]

 

نتائج

1. اعلام جمع ہے اوراس کی مفر د "عَلَم " عین اورلام کے فتحہ کے ساتھ بمعنی نشانی ہےاور اسی طرح دلائل جمع اور اس کی مفرد "دلیل" ہےجس کا معنی حجت اور ثبوت ہے۔
2. دلیل ہراس چیز کوکہاجاتاہے جسےبطور حجت اور ثبوت پیش کیا جا سکے جس کے جاننے سے دوسری چیز کاجاننا اور علم لازم آئے ۔
3. سیرت کے مصادر میں سے ایک اہم ترین نوع دلائل واعلام نبوت ہے جس سے مراد وہ تمام اعزازات، امتیازات، نشانیاں اوربراہین و ثبوت ہیں جورسول اللہﷺ کی رسالت اورعظمت و رفعت پردلالت کرتے ہیں ۔
4. دلائل واعلام نبوت اورمعجزات میں فرق ہے ۔معجزہ خاص ہے جس میں خرق عادت، چیلنج اورمعارضہ شرط ہے جبکہ دلائل واعلام مطلق ہیں ۔
5. امام ابوسعد الخرکوشی ؒکی" شرف المصطفیٰ" اورقاضی عیاض ؒ کی" الشفاء" دلائل واعلام نبوت کے حوالے سےبھی بہترین کتابیں ہیں۔
6. ان دونوں کتابوں میں صحیح کے ساتھ بعض انتہائی ضعیف اورموضوع اخباربھی مذکور ہیں اس لئے احتیاط لازم ہے ۔
7. ان دونوں کتابوں سےرسول اللہ ﷺ کی نبوت وعظمت ثابت کرنے کے لئے جن دلائل واعلام کاانتخاب کیاگیاہے وہ گیارہ انواع "حسن وجمال نبویﷺ، اعلی واشرف حسب ونسب، مکارم اخلاق، سیرت طیبہ، اُمیّت علامت نبوت، سابقہ کتب سماویہ میں تذکرہ، ارہاصات، آسمانوں کا شیاطین سے تحفظ، ختم اور مہر نبوت، فصاحت و بلاغت، معجزات" پرمشتمل ہیں۔

 

 

 

سفارشات

1. تمام کتب دلائل عمومی طورپراورشرف المصطفی اورالشفاء کاخصوصی طورپر مطالعہ کرکے ان سے صرف مستند اورصحیح دلائل واعلام کااستخراج کرکے مجموعہ مرتب کیاجائے ۔
2. نبوت ورسالت اورعظمتِ رسولﷺ کوثابت کرنے کے لئے صرف معجزات پرانحصار نہ کیاجائے ۔
3. رسول اللہ ﷺکی افضلیت اور علو شان کے اظہار و ثبوت کے لئے ضعیف اورموضوع و من گھڑت روایات والے اسلوب کوبالکل ترک کردیناچاہیے، یہ آپ ﷺ کے عالی مقام میں اضافہ کی بجائے کمی کاسبب ہے ۔
4. شرف المصطفیٰ اورالشفاء بہت اچھی کتابیں ہیں لیکن ان میں کمزور و ضعیف اورمن گھڑت آثار ہونے کی بنا پر عام آدمی کے لئے کماحقہ استفادہ کرنامشکل ہے ۔
5. اس کام کی اشد ضرورت ہے کہ ان کتابوں کے ساتھ عربی اوراردومیں ضعیف اورموضوع روایات کی فہرست شائع کی جائے تاکہ ان سے حقیقی طور پر استفادہ کیا جاسکے۔
6. عصر حاضر میں خطباء اورواعظین کی تربیت کااہتمام کیاجائے کہ وہ اپنی تقاریر میں من گھڑت روایات بیان نہ کریں ۔

حوالہ جات