1۔آداب کی تعلیم

2۔مذہبی تعلیمات پر عمل کی ترغیب

3۔ لکھائی پڑھائی کی تربیت

4۔عمومی اور فنی تعلیم کا انتظام

کتاب و سنت:

کتاب و سنت میں زیر حضانت بچوں کی تعلیم و تربیت کے باب میں اہم ضوابط کا ذکر حسب ذیل ہے:

1۔قرآن حکیم میں اپنے اہل وعیال کو آگ سے بچانے کا حکم یوں دیا گیا ہے:

ترجمہ:اے ایمان والو! اپنے آپ کو اور اپنے اہل وعیال کو آگ سے بچاؤ۔

امام جصاص اور امام ابن العربی کے نزدیک اس سے مراد اہل وعیال کی تعلیم وتربیت کرناہے تا کہ وہ جہنم کی آگ سے محفوظ رہ سکیں^[2]۔امام جصاص کے الفاظ حسب ذیل ہیں:

2۔حضرت عبد اللہ بن عمرؓ سے مروی حدیث کے مطابق مرد وعورت اپنی اولاد کے نگران ہیں۔رسول اللہ ﷺ کے الفاظ ہیں:

فکذلک علیہ تأدیبہ و تعلیمہ^[5]

3۔رسول اللہ ﷺ نے سات سال کی عمر میں بچے کو نمازپڑھنے کا حکم دیا۔ امام ابو داؤد کے الفاظ حسب ذیل ہیں:

مرواالصبی بالصلوۃ إذابلغ سبع سنین وإذا بلغ عشر سنین فاضربوہ علیھا^[6]

ترجمہ:بچے کو سات سال کی عمر میں نماز کا حکم دو اور جب وہ دس سال کا ہو تو نماز کی ادائیگی کیلئے اسے مارو۔

وفرقوابینھم فی المضاجع^[7]

ترجمہ:اور(دس سال کی عمر میں)ان کو بستروں سے جدا کردو۔

فمن کان سنہ‘ سبعاً فھومأمور بالصلاۃ علی وجہ التعلیم والتأدیب^[8]

ترجمہ:سو جس کی عمر سات سال ہو اس کو تعلیم وتادیب کے طور پر نمازپڑھانے کا حکم دیا گیا ہے۔

4۔حضرت جابر بن سمرۃ ؓ سے روایت ہے کہ رسول اللہ ﷺ نے فرمایا:

لأن یؤدب الرجل ولدہ خیر من یتصدق بصاع^[9]

ترجمہ:یہ کہ باپ کا اپنے بیٹے کو ادب سکھانا ایک صاع صدقہ کرنے سے بہتر ہے۔

اس راویت کے مطابق اپنی اولاد کی اچھی تعلیم وتربیت صدقہ وخیرات سے بہتر قراردی گئی ہے۔

5۔امام ترمذی ایک اور حدیث بیان کرتے ہیں جس میں والد کی طرف سے اولاد کیلئے بہترین تحفہ حسن ادب قرار دیا گیا ہے۔

ترجمہ:کوئی والد اپنی اولاد کو اچھے ادب سے بڑھ کر کوئی تحفہ نہیں دے سکتا۔

اس سے معلوم ہوا کہ کتاب وسنت کے مطابق اپنی اولاد کو تعلیم دلوانا،دین سکھانا،بھلائی کی باتیں اور ضروری آداب سکھانا والدین کی ذمہ داری ہے۔ اس تعلیم وتربیت کو والدین کی طرف سے اولاد کے حق میں بہترین تحفہ اور صدقہ و خیرات سے بہترعمل قرار دیا گیا ہے۔

فقہی مذاہب:

آئندہ صفحات میں زیر حضانت افراد کی تعلیم و تربیت کو فقہی مذاہب کی روشنی میں بیان کیا جائے گا:

احناف:

احناف کے نزدیک زیر حضانت افراد کی تعلیم و تربیت کے باب میں ولی کے کردار کے ضوابط حسب ذیل ہیں:

1۔خواتین ابتدائی عمر میں بچوں کی تربیت کیلئے زیادہ موزوں اور مناسب ہیں۔امام کاسانی کے الفاظ حسب ذیل ہیں:

والأصل فیھا النساء لأنھن اشفق وارفق واھدی إلی تربیۃ الصغار^[11]

ترجمہ:اور حضانت میں اصل حق خواتین کا ہے کیونکہ وہ زیادہ شفیق،رحم دل اور بچوں کی تربیت کیلئے ہدایت یافتہ ہے۔

اس سے معلوم ہوا کہ بچوں کو ابتدائی عمر میں خواتین کی تربیت کی زیادہ ضرورت ہوتی ہے۔اس لیے ان کو حضانت کا زیادہ حقدار قرار دیا گیا ہے۔

2۔بچی بلوغت تک ماں کی حضانت میں رہے گی تاکہ خواتین کے آداب واخلاق اور گھر کی خدمت کی تعلیم دی جا سکے۔امام کاسانی کے الفاظ یہ ہیں:

ترجمہ:اور یہ معنی بچی میں نہیں پایا جاتا سو اس کو ماں کے ہاتھ میں دے دیا جائے گا بلکہ اسے خواتین کے آداب،ان کے اخلاق اپنانے اور گھر کی خدمت کی تعلیم کی حاجت کے سبب بلوغت تک ماں کے پاس چھوڑنے کی ضرورت ہوتی ہے۔

سو بچیوں کو خواتین کے آداب و اخلاق اور گھر کی خدمت سکھانا ان کی تربیت کا لازمی حصہ ہے اور یہ تربیت خواتین ہی بہتر انجام دے سکتی ہیں۔

3۔جب بچہ خود کھانے پینے کی عمر(سات سال)کو پہنچ جائے تو اسے آدمیوں کے اخلاق و آداب سیکھنے اور علم حاصل کرنے کی ضرورت ہوتی ہے۔امام مرغینانی اور امام کاسانی نے اس کو بیان کیا ہے^[13]۔امام کاسانی کے الفاظ یہ ہیں:

اس سے ثابت ہوا کہ سات سال کے بعد بچے کو آدمیوں کے اخلاق اور علوم کے اسباب(تعلیم کے بنیادی امور)سکھانا باپ کی ذمہ داری ہے۔

4۔باپ زیر حضانت بچوں کو تجارتی،صنعتی اور فنی علوم سکھانے کیلئے ان سے اجارہ کروا سکتے ہیں۔امام جصاص فرماتےہیں کہ:

إن فی إیجارہ فی الصنائع من باب التہذیب والتادیب والریاضۃ^[16]

لہذا عصری تقاضوں کے مطابق بچے کی ذات کا اجارہ مختلف انواع کی ٹیکنیکل اور فنی مہارت کے حصول کیلئے ضروری ہے۔

شوافع:

شوافع کے نزدیک زیر حضانت افراد کی تعلیم وتربیت کے باب میں ولی کے کردار کے ضابطے حسب ذیل ہیں:

1۔بچہ ماں کو اختیار کرے تو ماں، باپ کو اس کی تادیب سے نہیں روک سکتی۔امام شافعی کے الفاظ یہ ہیں:

فإن إختار أمہ فعلی أبیہ نفقتہ ولا تمنع من تادیبہ^[17]

امام شافعی اس کی مزید وضاحت یوں کرتے ہیں:

ویخرج الغلام إلی الکتاب والصناعۃإِن کان من أہلھا ویاوی عندامہ^[18]

امام نووی ولی پر زیر حضانت بچے کی تعلیم وتادیب کو واجب قرار دیتے ہیں۔ان کے الفاظ یہ ہیں:

تادیبہ وتعلیمہ واجب علی ولیہ اباً کان أوجدًا أو وصیاً أوقیماً^[19]

ترجمہ:اس کی تادیب اور تعلیم اس کے ولی پر واجب ہے خواہ وہ باپ ہو یا دادا یا وصی یا منتظم۔

سو مختصراً یہ کہ بچے کے ماں کو اختیار کرنے کی صورت میں بھی باپ پر بچے کی تعلیم وتربیت لازم ہے۔

2۔اگر بچہ اپنے باپ کو اختیار کرے تو باپ اسے اس کی ماں کی زیارت سے منع نہیں کر سکتا۔امام شافعی کے الفاظ یہ ہیں:

وإِن أختار أباہ لم یکن لأبیہ منعہ من أن یاتی أمہ وتاتیہ فی الایام^[20]

لأن المنع من ذلک إغراء بالعقوق وقطع الرحم فإن مرض کانت الأم أحق بتمریضہ^[21]

اس سے معلوم ہوا کہ بچہ ماں سے ملاقات کر سکتا ہے اور ماں اس سے ملاقات کر سکتی ہے تا کہ ماں کی شفقت بھی میسر آ سکے۔

3۔اگر بچی ہو تو اس کی ماں کو اس کے پاس آنے سے منع نہیں کیا جائے گا۔اور اگر ماں بیمار ہو تو بچی عیاد ت کیلئے جائے گی۔امام شافعی فرماتے ہیں:

4۔امام ماوردی کے مطابق اگر بچی اپنی ماں کو اختیار کرے تو رات دِن بچی کی حقدار ہے کیونکہ بچی حیا دار ہوتی ہے۔سو اس کا باہر نکلنا منع ہے تا کہ اس کی حفاظت ہو سکے اور اس کے باپ کیلئے اس کی زیارت جائز ہے تا کہ آپس میں الفت و محبت قائم ہو۔ملاقات کے وقت زیادہ دیر نہیں ٹھہرے گا مگر زیارت کے وقت محرم مرد یا ثقہ خواتین ہوں تا کہ طلاق ہونے کے بعد خلوت کے شک کی نفی ہو سکے^[23]۔بچی کیلئے دونوں صورتوں میں والدین کی ملاقات کی اجازت سے ان کی بہتر تربیت ممکن ہے۔

حنابلہ:

حنابلہ کے نزدیک زیر حضانت افراد کیلئے تعلیم وتربیت کے باب میں ولایت کے کردار کے ضوابط حسب ذیل ہیں:

1۔بچی کو کاتنے اور پکانے کی گھر میں تعلیم کا اہتمام کیا جائے گا۔امام ابن قدامہ کے الفاظ یہ ہیں:

اس سے معلوم ہوا کہ بچی گھر کے امور میں مہارت حاصل کرے گی۔اس ضمن میں وہ بطور خاص سلائی (Tailoring) اور پکائی(Cooking)کے متعلقہ علوم حاصل کرے تا کہ وہ عملی زندگی میں کامیاب ہو سکے۔

2۔والدین میں سے کسی ایک کے پاس بچی ہو تو دوسرے کو زیارت سے منع نہیں کیا جائے گا۔امام ابن قدامہ کے الفاظ یہ ہیں:

وإِن مرضت فالام أحق بتمر یضھا فی بیتھا^[26]

ترجمہ:اور اگر وہ بیمارہو جائے تو ماں اس کے گھر میں اس کی تیمارداری کی زیادہ حقدار ہے۔

1۔والدین میں سے ایک کو دوسرے کیلئے بچی کی زیارت کی اجازت۔

2۔خاوند کا اپنی مطلقہ بیوی کے ساتھ تنہائی سے اجتناب۔

3۔خاوند کیلئے اس کے ہاں طویل قیام کی ممانعت۔

4۔بچی بیمار ہو تو ماں تیمارداری کی زیادہ حقدار۔

3۔بچہ سات سال کے بعد اپنے اختیار کے ساتھ ماں کے پاس ہو تو ماں کے پاس رات کے وقت ہو گا اور دِن کے وقت باپ مدرسے یا انڈسٹری میں لے جائے گا۔امام ابن قدامہ کے الفاظ یہ ہیں:

کان عندھا لیلاً وےأخذہ الأب نھارًا لیسلمہ في مکتب أوفي صناعۃ^[27]

اس سے معلوم ہوا کہ بچہ ماں کے پاس ہو تو باپ اس کی عمومی تعلیم یا فنی تعلیم کا انتظام کرے گا۔

4۔اگر بچہ سات سال کے بعد باپ کے پاس ہو تو دِن رات اس کے پاس رہے گا مگر اسے ماں کی زیارت سے نہیں روکے گا۔المغنی میں ہے:

5۔والدین میں سے کسی ایک کے بیمار ہونے یا وفات پانے پر آنے سے بچی اور بچے کو منع نہیں کیا جائے گا۔المغنی میں ہے:

ان عبارات سے درج ذیل امور ثابت ہوئے:

1۔عصری تقاضوں کے مطابق اولیاء کیلئے بچے اور بچی کی تعلیم اور فنی مہارت کا اہتمام۔

2۔والدین کے ساتھ ملاقات وزیارت کا انتظام۔

مالکیہ:

مالکیہ کے نزدیک زیر حضانت بچوں کی تعلیم وتربیت کے حوالے سے ولی کا کردار حسب ذیل ہے:

1۔بچہ ماں کی حضانت میں ہو تو باپ دِن کے وقت تادیب وتعلیم کا انتظام کرے گا۔امام سحنون فرماتے ہیں:

اس سے معلوم ہوا کہ بچہ ماں کی حضانت میں ہو تو باپ دِن کے وقت ادب سکھائے اور لکھائی کا فن بھی سکھانے کا انتظام کرے گااورزیر ولایت افراد کی تعلیم وتربیت اور پرورش کے اخراجات ان کے مال سے ادا ہوں گے۔اگر ان کے پاس مال نہ ہو تو جن کے ذمے اس کا نفقہ ہے ان پر حضانت کے اخراجات لازم ہوتے ہیں،جیسے کہ سابقہ اوراق میں اس کا جائزہ فقہی آراء کی روشنی میں لیا گیا۔

بچوں کی تعلیم وتربیت کے حوالے سے اس تمام بحث کا خلاصہ حسب ذیل ہے:

1۔کتاب وسنت میں بچوں کی تعلیم وتربیت کو والدین پر لازم قرار دیا گیا ہے۔

2۔مذاہب اربعہ کے مطابق بچوں کی تربیت،مردوں کے آداب کی تعلیم، کتابت کی ٹریننگ نیز تجارت(Commerce) اور صنعت(Industry)جیسی فنی تعلیم(Technical education)زیر ولایت افراد کو دلوانا اولیاء کے فرائض میں سے ہے۔

3۔بچیوں کی تربیت،خواتین کے آداب نیز ان کو گھریلو امور جیسے کاتنے اور پکانے کی مہارت سکھانا بھی اولیاء پر لازم ہے۔

4۔والدین میں سے کسی ایک پاس بچہ یا بچی ہو تو دوسرے کو اس سے ملاقات کی اجازت ہو گی تاکہ ممکنہ حد تک بچے کی بہتر تربیت ممکن ہو سکے۔

مروجہ قوانین:

زیر حضانت بچوں کی تعلیم و تربیت کا گارڈینز اینڈ وارڈز ایکٹ میں یوں ذکر ہے:

And must look to his support, health and education.^[31]

ترجمہ:اور ولی(اپنے زیر حضانت بچے کی)مدد،صحت اور تعلیم کا ضرور خیال رکھے۔

عدالتی فیصلہ جات:

عدالتی فیصلہ جات میں بھی حضانت کے حق کا فیصلہ بچوں کی بہبود کے حوالے سے ہوتا ہے اور ان کی بہبود میں بنیادی اہمیت ان کی تعلیم وتربیت کو حاصل ہوتی ہے۔اس حوالے سے بعض فیصلہ جات حسب ذیل ہیں:

1۔مسز روبیہ گیلانی بنام ظہور اختر راجہ کیس سپریم کورٹ آف پاکستان میں جسٹس اجمل میاں،جسٹس منور احمد مرزا اور جسٹس چوہدری محمد عارف کی عدالت میں پیش ہوا۔ان کے تینوں بچے(عمر،حارث،خالد)نو سال سے زائد عمر کے تھے اور باپ کی حضانت میں تھے مگر لارنس کالج مری میں بچوں کی تعلیم کے سبب اپنی والدہ سے دور تھے۔اس لیے ماں سے ملاقات ممکن نہ تھی لہذا ماں کیلئے حضانت کا مطالبہ کیا گیا مگر فاضل عدالت نے اچھی تعلیمی سہولیات کے سبب باپ کے حق میں حضانت کا فیصلہ کیا۔اس کا ذکر فیصلے میں یوں کیاگیاہے:

However, we simultaneously feel that character of the child is not fully developed in the absence of maternal affection.^[33]

1۔بچے موسم گرما اور سرما کی تعطیلات کے دوران لاہور میں اپنی والدہ کے ساتھ رہیں گے۔

2۔ماں کالج کے پرنسپل سے اجازت لے کر مہنیے میں ایک بار کالج میں بچوں سے ملاقات کر سکے گی۔

2۔مسز اسلم خاتون بنام محمد منیر کیس لاہور ہائی کورٹ میں جسٹس سید نجم الحسن کاظمی کی عدالت میں پیش ہوا۔اس میں نو سالہ بچے اور آٹھ سالہ بچی کی حضانت کا معاملہ تھا۔دونوں بچے لاثانی کیڈٹ پبلک سکول میں پڑھ رہے تھے۔مناسب تعلیم اور اچھی صحت کے سبب ماں کو حضانت کا حق دیا گیا۔اور باپ کیلئے ہر مہینے کے پہلے اور آخری سوموار عدالتی حدود اور عدالتی اوقات کے دوران بچوں سے ملاقات کی اجازت ہو گی^[34]۔

3۔مسز نسیم کوثر بنام سلیم وغیرہ کیس لاہور ہائی کورٹ میں جسٹس عبد الشکور پراچہ کی عدالت میں پیش ہوا۔یہ محمد عاقب سلیم کی حضانت کا کیس تھا،اس فیصلے میں ماں کو حضانت کا حقدار قرار دیا گیا۔اس کی وجہ یہ تھی کہ باپ کی نسبت ماں زیادہ بچے کی بہبودکی دیکھ بھال کر سکتی ہے کیونکہ باپ سپیئر پارٹس کی دوکان پر زیادہ وقت صرف کرنے کے سبب اسے زیادہ وقت نہیں دے سکے گا۔یوں بچے کو تمام وقت سوتیلی ماں کے پاس گزارنا پڑے گا۔عدالت نے یہ فیصلہ بھی کیا کہ گارڈین جج باپ کی اپنے بچے کے ساتھ ملاقات کا پندرہ روزہ شیڈول بنائے گا اور اسکے علاوہ عید کی تعطیلات،موسم گرما اور موسم سرما کی تعطیلات کے دوران بھی ملاقات کا انتظام کرے گا^[35]۔

اس بحث سے معلوم ہوا کہ کتاب وسنت،مذاہب اربعہ اور مروجہ قوانین کے مطابق زیر ولایت افراد کی بہتر تعلیم وتربیت اولیاء پر لازم ہے۔عدالتی فیصلہ جات میں بھی بچوں کی بہتر تعلیم وتربیت کو حضانت کے استحقاق کیلئے اہم حیثیت حاصل ہوتی ہے نیز عدالتی فیصلہ جات میں والدین میں سے کسی ایک کے پاس حضانت کی صورت میں دوسرے کے لیے ملاقات کے باقاعدہ شیڈول کا اہتمام کیا جاتا ہے۔

1۔کتاب وسنت کے مطابق بچوں کی تعلیم وتربیت والدین پر لازم ہے۔مذاہب اربعہ اور عصری تقاضوں کے مطابق بچوں کی تربیت،مردوں کےآداب،کتابت کی ٹرنینگ نیزتجارت(Commerce)،صنعت(Industry)جیسی فنی تعلیم (Technical Education) اولیاء پر لازم ہے۔

2۔عصری تقاضوں کے مطابق بچیوں کی تربیت،خواتین کےآداب،گھریلوصنعت ودیگرامورجیسےبنائی(Knitting)،سلائی (Tailoring)اورپکانےکی مہارت سکھانا بھی اولیاء پر لازم ہے۔

3۔والدین میں سے کسی ایک کے پاس بچہ یا بچی ہو تو دوسرے کو اس سے ملاقات کی اجازت ہو گی تاکہ ممکنہ حد تک بچے کی بہتر تربیت ممکن ہو سکے۔

4۔ مروجہ قوانین میں بھی زیر حضانت افراد کی تعلیم اولیاء کے فرائض میں سے ہے نیز عدالتی فیصلوں میں بھی بچوں کی تعلیم وتربیت کو بنیادی اہمیت حاصل ہوتی ہے۔علاوہ ازیں والدین میں سے کسی ایک کے پاس حضانت ہو تو دوسرے کو بچوں سے ملاقات کے باقاعدہ شیڈول کا اہتمام کیا جاتا ہے تا کہ ان کی تربیت کی تکمیل ہوسکے۔

حوالہ جات